Zinema euskaraz gozatzeko aukera izango dute gaztetxoek Durangoko Azokan

Zinema euskaraz gozatzeko aukera izango dute gaztetxoek Durangoko Azokan –

Zineuskadik, euskal ikus-entzunezkoaren sektorea bateratzen duen plataformak, hainbat proiekzio eta soinu efektuak egiten ikasteko tailerra antolatu ditu Durangoko Azokarako.

Zineuskadik Durangoko Azokan parte hartuko du aurten ere, haur eta gaztetxoei zuzenduriko hainbat ekintzarekin. Zinema Euskaraz programaren barne, euskaraz bikoiztutako filmen proiekzioak eskainiko ditu, baita soinu efektuak egiten ikasteko tailerra ere.

Zinema euskaraz gozatzeko aukera izango dute gaztetxoek Durangoko AzokanPixelatu enpresak dinamizatutako ekimena abenduaren 5ean gauzatuko da. Soinuak pelikula batean duen pisuaz jabetzeko aukera izango dute parte-hartzaileek; izan ere, nahiz eta elementu garrantzitsuenetarikoa izan, istorioari ematen dion sinesgarritasuna dela eta, gutxitan erreparatzen zaio faktore horri. Tramankulu desberdinak erabiliz, animaziozko film batean soinu efektuak nola sortzen diren ezagutu eta birsortu egingo dituzte.

Goizeko 10.00etatik 12.00etara eta 12.30etik 14.30era, bi saio eskainiko dira azokako Irudienea gunean. Gazteak zinemagintzara hurbildu eta filmak beste belarri batzuekin entzunaraztea izango da tailerren xedea, baita haien irudimenari eta sormenari ateak irekitzea ere.

Hurrengo egunetan, berriz, pelikulen proiekzioez gozatu ahal izango dute etxeko txikiek, doan. Abenduaren 6an, 15.00etan, “Harpetarra” pelikularen emanaldia izango da, Harri eta Brontze Aroetako ordezkarien arteko lehiari buruzko abenturazko istorioa.

Hilaren 7an, aldiz, hiru proiekzio eskainiko dira. Goizeko 11.00etan, “Gruffaloa” filmaren txanda izango da, animalia-izaki berezi bati buruzko pelikula ederra; eta 12.00etan, Euskal Herriaren historian murgiltzeko aukera izango dute haurrek Lur eta Amets filmarekin. Amaitzeko, arratsaldeko 15.00etan, fantasiazko istorio batean barneratuko dira bertaratuak, magiaz beteriko “Horman erlojua duen etxea” pelikulari esker.

Zinema euskaraz gozatzeko aukera izango dute gaztetxoek Durangoko Azokan

ZINEUSKADI irabazi-asmorik gabeko elkartea da eta kide fundatzaileen artean daude Eusko Jaurlaritzako Kultura Saila eta Euskadiko produktoreen bi elkarteak:IBAIA eta EPE-APV. 2014 urtetik Euskal Irrati Telebista, Festival Internacional de Cine de Donostia San Sebastian S.A. eta Fundación Filmoteca Vasca erakundeak ditu bazkide.