Sarrionandiaren testua Euskadi Sarietarako

Sarrionandiaren testua Euskadi Sarietarako

Joseba Sarrionandiak testu bat bidali du bere arreba Mariajek irakur dezan, Euskadi Sarien ekitaldian. Gure eskuetara ere iritsi da, argitaratzeko aukerarekin.

 

“Eskerrik asko, lehenengo, euskaraz bezala beste hizkuntza guztietan hain ederra den esaera, eta baztertuek laguntza eskertzeko erabiltzen dutenean are ederrago egiten dena. Eskerrik asko, beraz, epaimahaikoei, ausardiagatik, hartutako erabakiak erreakzioak izango zituela jakin arren aurrera egin zutelako. Eskerrik asko, baita ere, satanizatuaren defentsa egin dutenei, espainiar prentsan batez ere, non euskaldunok hainbat alorretan arerioen lurrean bezala ibili behar izaten dugun.

Eskerronez gogoratu nahi ditut, bestalde, aurten irakurri ditudan saiakera lau liburu eder: Autopsiarako frogak Koldo Izagirrerena, Walter Benjaminen aingerua Gernikako bonbardaketatik Ignazio Aiestaranena, Goizuetan bada gizon bat Patziku Perurenarena eta Darwin gurean Kepa Altonagarena. Irakurriala ikusi dut nire kezka eta larritasunak haienak ere badirela, eta ez dutela sari hau nik baino gutxiago merezi.

Baina ez naiz etorri eskerrak ematera bakarrik. Gauza eskergabe batzuk ere aipatu nahi ditut. Prentsan esan da ez dudala gure herriko politikari buruz idazten,neure defentsan bezala. Baina  Moroak gara behelaino artean? liburuko orrialde guziak politikari buruzkoak dira. Ez kaleko edo prentsako ohiko eztabaiden terminoetan beharbada, baina, sarrera historikoaren ondoren, batez ere azken hirurehun orrialdeak geure gatazka eta aukerei buruzko hausnarketak dira.

Nire ume denboretako Don Celesen periodikua izan da sariaren iskanbilari buruz paperean heldu zaidan bakarra. Besteren artean, Euskal Herriko Unibertsitateko Teoria Politikoko irakasle baten artikulua irakurri dut. Esaten du, gutxi gora-behera, edozein gobernuk bere sokako literatura bultzatzeko obligazioa duela. Hortik atera daitekeen ondorioa da literaturak berak egiten duela sasoian sasoiko gobernuaren promozio lana, eta ez alderantziz.

Literaturak naturalago azaltzen ditu arazoak eta formulatzen ditu galdekizunak, nik uste, egia zuzenetsiak eta instituzioak promozionatzea besterik da…”

Sarrionandiaren testua Euskadi Sarietarako
ZuZeu

ZuZeuko erredakzioko kazetariak eta editoreak gara.

Zer duzu buruan “Sarrionandiaren testua Euskadi Sarietarako”-ri buruz

  • Gonzalo Etxague
    Gonzalo Etxague 2011-11-24 00:26

    Sarrionadiaren liburuari egin diezaiokedan kritirik onena da pentsarazi didala, ideia berriak eman dizkidala, gure lurra eta munduko beste guztiak ulertzeko modu berria ere eman didala. Asko da hori, batez ere, pentsamendua mediokritateak bizi duen garaiotan. Ideiak anabasan ibili ohi ditugu buru barruan, harik eta pertsona batek haiek ordenatzeko gakoak ematen dizkigun arte. Orduan oso erraza iruditzen zaigu bidea, begibistakoa. Baina, amigo, norbaitek eman behar digu norabidea. Itzal luzea uzteko etorri da lan bikain erraldoi hau. Horregatik eta guztiagatik, eskerrik asko, Joseba. Arima larritasuneraino perfumatu gabe gaude zure zain, sikiera bisita egiteko.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude