Musika sortzaileak: zer dira egile eskubideak?

2017-10-03 07:59
Azkue Fundazioa
- Kultura

Musika sortzaileak: zer dira egile eskubideak? –

Aurton Banden Lehiaren 9.edizioa ospatuko da eta egitasmoen artean, Euskal Kulturgileen Kidegoak, Azkue Fundazioarekin elkarlanean Musika sortzaileak: zer dira egile eskubideak? izenburupean mintegia antolatu dute, urriaren 19an, osteguna arratsaldeko 19:00etatik aurrera, Euskararen Etxean.

Jabetza intelektuala, musikari dagokionez, izango da, bereziki, mintegian jorratuko den gaia. Alde batetik, Jokin Erkorekak EKKIko ordezkariak azalduko du: sortzaileek, artista interpretatzaileek eta ekoizleek dituzten eskubide moralak eta ekonomikoak; musika plagiotik edota autoretzatik babesteko erregistro publikoak eta pribatuak; zer egin zure musika zure baimenik gabe erabiltzen badute; nondik datozen egile eskubideetako irabaziak; edota zertarako balio duten SGAE, AIE, AGEDI edota EKKI bezalako kudeaketa erakundeek jakiteko; izango dira ere mintegian azpimarratuko diren beste ezaugarriak.

Eta bestetik, Mikel Inunziagak, “Inun” kantagileak eta Ane San Miguelek “Aneguria” Bilboko rap abeslariak, beraien esperientzia, musikariak bezala, kontatuko dute.

“Inun” gaztaro osoa darama musikari lotua. Bakarka zein hainbat musikarirekin era askotako proiektuetan ibili zen 2014ko maiatzean bere lehen diskoa kaleratu arte, ‘Berreginez’ izenekoa. Grabaketa zuzenean egin zuen, gitarra, ahotsa eta erritmo elektroniko eta akustikoak loop pedalekin konbinatuz. 2016ko urrian ‘Da nola’ izeneko bigarren diskoa aurkeztu zuen. Hainbat euskal idazleren poema musikatu dakartza lan berriak, Miranderen ‘Oianone’ eta Itxaro Bordaren ‘Zure sahetsean’, besteak beste.

Aneguria Eskina Femenina, Lapiko KLika eta La DolÇe Rima taldeen sortzaileetako bat izan da, besteak beste. 2015ean La Basu rap abeslariak Aire es vida diska plazaratu zuen eta “Trakamatraka” euskarazko abestian hartu zuen parte. Eta aurton, aurreneko diska kaleratu du, autoekoitua, Horchata de chufa.

Banden Lehia Azkue Fundazioak sortutako lehiaketa da, euskal musika sustatu eta talde berriei hauspoa emateko helburuak dituena. Banden Lehiako bederatzigarren edizio honetako finala azaroaren 24an ospatuko da Bilborocken eta Itziarren Semeak izango da aurton joko duen taldea.