Sautrela 405: Mikel Ayllon, Doctrina Christiana eta Atari ahantziak

Mikel AyllonOpera prima bat izango dugu liburu nagusi gaurko Sautrelan. Mikel Ayllonek bere estreinako literatur lana argitaratu du Igartza bekari esker, Ez tiro egin anbulantziei izenburukoa, eta hari buruz jardungo gara idazlearekin. Aurretik kronika liburu bat zuen idatzia Paul Asensiorekin batera, Gerezi gorrien garaia. Izan ere, Ayllon itzultzaile eta idazle ez ezik ekintzailea ere bada, eta Auzitegi Nazionalean epaitua izan zen beste zenbait gazterekin batera. Epaiketako gorabeheren berri eman zuten hain justu liburu hartan. Ez tiro egin anbulantziei liburua, berriz, ezohikoa da inondik ere. Kutsu distopikoduna, ezleku eta ezdenbora batean kokatua dago: bakardadea, kartzela, amodioa, borroka… Osagai mordoa duen liburua dugu, egungo gizarteaz eta etorkizunezkoaz hausnar egiten duena, ez oso modu agerikoan hori bai.

Erreportajean berriki egindako aurkikuntza bati buruz jardungo gara. Aziti Bihia elkarteko kideek Esteve Materraren, XVII. mendeko euskal idazlearen, liburu bat aurkitu dute Kopenhagen. Doctrina christiana liburua ezagutzen zen, baina ez zen oraindik haren lehen ediziorik topatu; horixe da, hain justu, ikertzaileok aurkitutakoa. Horren harira, bada, Materrari berari buruz eta liburuari buruz gehiago jakingo dugu. Zer garrantzia du liburuak? Zer bereizgarri du Materrak?

Beñat Sarasolak, saioarekin amaitzeko, poesia liburu bat ekarriko digu, Aurelia Arkotxaren Atari ahantziak. Horixe izan zen Arkotxak argitaratu zuen lehen liburua, 1993. urtekoa.
Ohiko legez, larunbatean izango dugu ikusgai, 15.00etatik aurrera, ETB1en.

Saioa osorik ikusteko klikatu hemen