Martxoaren 9koak

2021-03-13 10:45
Elixabete Garmendia
- Feminismoa

Martxoaren 9koak –

Bi balkoi eta beste baten ertza ageri dira. Erdiko balkoian trapu morea, emakumeen askapenaren ikurrarekin. Bi lelo irudiei laguntzeko: “Gora borroka feminista” eta “Egunero da martxoak 8”. Hori da gaur Zaldieroak dakarrena.

Martxoaren 9koak

Batzuetan gertatzen dira halako sinergia eta kontra-sinergia batzuk hainbat mezuren artean, eta gaurkoa kasu horietako bat da. BERRIAren hamazortzigarren orrialdean Zaldieroarenak eta Eider Goenagarenak egin dute topo. Goenagaren izenburua: “Gaur ez da Martxoak 8”. Ea, zertan geratzen gara: egunero da martxoak 8 ala gaur ez da martxoak 8? Goenagaren arrazoiak hitzez hitz: “Tamalez, gaur ez da martxoaren 8a. Eta gaur dena bere onera itzuliko da”. (Bere onera, letra etzanez idatzita doa).

Orrialde berean Andoni Egañak bere aurreiritzi baten aitorpena egiten du; nola behin Maialen Lujanbiori bertsotarako gai hau jarri zioten: “Jubilatu zinenetik maiz joaten zara mendira bakarrik”. Egañak gizonezkoa ikusi omen zuen Lujanbiok botatako bertsoetan. Alegia, logika paradigmatikoa: mendira bakarrik joaten denak gizonezkoa behar du izan derrigor.

Gaurko BERRIAren hamazortzigarren orrialde horri Goizalde Landabasoren artikuluak eman dio bukaera. Izenburua, potentea: “Emakumeak gorroto dituzten gizonezkoak”.

Atzo, astelehena, BERRIArik ez, eta biharamunera pasatu dira emakumeen eguneko mezuak. Modu horretara indartu egin da Zaldieroak jasotako leloa: egunero da martxoak 8.