Osakidetzako Enplegu Publiko Eskaintzako azterketak euskaraz egitea, praktikan ezinezkoa

Osakidetzan euskaraz lan egin ahal izateko eskubidea onartua eta arautua dago. Are gehiago, aukera hori bultzatu beharra ezartzen du Osakidetzaren II Euskara Planak. Praktikan, ordea, eskubide hori gauzatu ezina egiten duten erabakiak hartzen ditu Osakidetzak. Erdara da Osakidetzako hizkuntz “arrunta”, eta erdararen unibertsotik hartzen dira erabakiak. LAB sindikatuak Osakidetzako Enplegu Publiko Eskaintzan azterketa euskaraz egiteko zailtasunak salatu ditu.

Euskal Herrian gaur egun ikasle kopuru haundi batek euskaraz burutzen ditu bere ikasketak. Lan munduan euskaraz eta euskaratik aritzeko prestatuak daude, beraz. Osasungintzan ere, modu naturalean euskaraz bizi eta aritzeko gai, kalitatezko zerbitzu elebiduna eskaintzeko prestatuak.

Une honetan Osakidetzak Enplegu Publiko Eskaintza egin du, jadanik milaka herritarrek eman dute bertan parte hartzeko izena, eta jarriak dira azterketa prestatu ahal izateko materiala eta bibliografia eskuratzen.

Euren ikasketak euskaraz egin dituztenek Osakidetzako EPEko azterketak euskaraz prestatu eta egin ahal izango dituzte? Zoritxarrez, ez. Adibidez, erizain, mediku, fisioterapeuta, emagin eta laborategi teknikari kategoriako EPE azterketak prestatzeko Osakidetzak jakinarazi duen bibliografia gehiena erdaraz soilik dago. Ikasgaiak erdaraz daude eta erdaraz ikasi behar dira. Hori horrela izanik, ikasgaiak erdaraz ikasi behar izan dituzten euskaldun gehienek EPE azterketa hizkuntza berdinean, erdaraz, egingo dute, ulergarria denez.

Arazo horretaz gain, aipagarria da Osakidetzako kategoria guztietako EPE azterketak jatorriz erdaraz prestatzen direla, eta euskarazko bertsioatako itzulpenak sarritan halamoduzkoak izaten dira, ulergaitzak erabat.

Guzti honen ondorioz euren eskola edota unibertsitate ikasketak euskaraz burutu dituzten gehienek amore eman eta Osakidetzan sartzeko frogak erdaraz prestatu eta burutzen dituzte. Osakidetzan euskaraz bizi nahiko genukeen langile-gai eta langileok lehen egunetik erdaraz bizi eta lan egitera kondenatuak gaude. Izan ere, esan beharrik ez dago Osakidetzan lanpostua eskuratu ezkero lan hizkuntza, lan tresnak, guztia, erdaraz dela.

Berriro ere, Osakidetzako buruzagien hitz politez haratago, euskaraz bizi ahal izatea posible egingo duten erabaki eta neurriak eskatzen ditugu. Zehazki, Enplegu Publiko Eskaintzako azterketei dagokionez, euskaraz prestatu eta egin ahal izateko eskaera egin diogu Osakidetzari. Enplegu Publiko Eskaintzan euskaraz jadanik dagoen bibliografian oinarrituriko euskarazko azterketak prestatu eta euskarazko bibliografia hori zabaltzeko neurriak hartu ditzala eskatu du LAB sindikatuak.

Hemen behean, adibide moduan, Erizaintzako azterketa presatu ahal izateko bibliografia, Erizaintza kategoriako Osakidezaren oinarrietan azaltzen dena.

erizaintza bibliografia erdaraz

epe, euskara, ope, Osakidetza
osaeus

Osasungintzan euskaraz bizi eta lan egin nahi dugu! www.osaeus.eus

Utzi erantzuna

Zure e-posta helbidea ez da argitaratuko. Beharrezko eremuak * markatuta daude