Hizkuntza politika “paradoxikoez”

Hizkuntza politika “paradoxikoez”

Hizkuntza politika “paradoxikoez”Trumpek espainiera bere gobernuaren webgunetik ezabatu du kolpetik, ikusezinen zakura jaurtiz, hegoamerikarren hizkuntza nagusiaren hedapenari mugak jartzeko xedez.
Paradoxak zer diren, espainiera ez diren hizkuntzak alboratzen maisu diren Espainiako Err(d)einuko “nonacionalistak” sutan jarri dira, errespetu falta handiak eta erdeinuak salatuz.

Paradoxikotzat jo zuen Espainiako gobernuaren jarrera Eusko Jaurlaritzako Gobernantza sailburu Josu Erkorekak orduan, azpimarratuz gobernu horrek hutsune ikaragarriak erakusten dituela euskararen, katalanaren eta bestelakoen erabilerari dagokionez.
Oso-oso berandu dabil Gobernantza sailburua baina.

Espainiako gobernuen euskaldunekiko utzikeria eta erdeinua oso aspaldikoak dira. Euskara guztiz ordezkatzeko hizkuntza politikaren parte dira erdeinuak, debekuak eta indarkeria ere. Erkorekak oso gertutik ezaguten du Espainiako kongresuan euskaraz jarduteko erabateko debekua adibidez. Bai berak, bai EAJ-k, bai ezker abertzaleak ere, zirkinik egin barik onartutako debekua bestalde.

Baina espainiarren hizkuntza politika, euskara (eta besteak) ahal bait arinen museoratzeko diseinatu bada, EAEko erakunde nagusien politikak, azken euskaldunoi “zaintza paliatibo” batzuk emateko pentsatua dirudi, euskaldunen komunitatea berrosatzeko baino gehiago.

Adibidez, zazpi lanpoltsa deitu ditu oraintsu Gobernantza eta autogobernu sailak.
Ohi bezala, guztietan da ezinbestekoa espainiera menperatzea. Hain da ezinbestekoa ze, deialdian jaso ere ez baita egiten… ez dagoelako aipatu beharrik.

Euskara meritutzat baino ez da jotzen Jaurlaritzako abokatu, mediku, goi-teknikari edo lan-aholkulari izateko deialdi honetan. Aldiz, ezinbestekoa izango da euskara maila juxtukoa (2.HE) aitortzen duen agiriaren jabe izatea administrari izateko, eta EGA (3.HE) beharko da liburuzain edo Osasun saileko teknikari izateko. Hortaz, Jaurlaritzako jardunean gako diren lanpostu asko, erdaldunekin beteko dira beste behin ere.

Españolez lan egingo duten eta euskaraz lan egitea ezinezko bihurtuko duten gazte erdaldunek beteko dituzte abokatu, goi-teknikari, mediku edo lan-aholkulari lanpostu asko Gobernantza sailaren deialdiari esker. Horra EAEko Administrazio nagusian espainiera hutsezko jarduna beste bizpahiru hamarkadetan bermatzeko jokaldia. Horra txantxa gorria.

Paradoxikoa badirudi ere, Gobernantza sailaren ohiko jarduna erdara hutsezkoa baita ia %100, Jaurlaritzako sail gehienetan bezala. Euskarara itzultzen da prozeduren azken emaitza, eta ez beti. Azken uneko Itzulpenen bidez ematen zaio “euskaldun” itxura Eusko Jaurlaritzari, EAEko beste herri-administrazio askori bezala.

Jaurlaritzaren ordezkariak (Gobernantza sailekoak) langileen ordezkariokin biltzen dira hilean behin edo birritan. Batetik, euron bozeramaleak ez daki euskaraz. Bestetik, helarazten diguten dokumentazio ugaria erdara hutsez ematen digute beti, ELAkook behin eta beste behin eskatu diegun arren euskaraz ere helarazteko. Horrela, gu ere behartzen gaituzte eztabaida-gaiak erdara hutsez lantzera. Esan gabe doa, Eusko Jaurlaritzan gertatzen den euskararen erabilera “paradoxikoaz” beste hamaika adibide eman daitezke sailez sail.

Paradoxikoki, “Eusko” Jaurlaritzan lan egiten dugun euskaldunoi egunero adierazten zaigu garbi gure leku bazterrekoa zein den, euskara ez dela beharrezkoa, eta gure eskubideak oso mugatuta daudela bertan, txantxangorri erraldoiak Jaurlaritzako atezain izanagatik.

Herritarrok ordaindutako hedabideak lagun, erraza dago inguruotan euskaltzale itxurak egitea agintean daudenentzat. Hain dira zatarrak eta amorratuak euskaldunon zapaltzaileak! Hain da menpekoa eta desitxuratua herri ekimeneko euskalgintzaren jarduna aspaldion! Hain azalekoa agintari abertzale askoren euskaltzaletasuna!

Hizkuntza politika “paradoxikoez”
JJ Agirre

ELAkidea eta abar.

5 pentsamendu “Hizkuntza politika “paradoxikoez””-ri buruz

  • Jaurlaritza beti itxuraeuskeriatan.

  • Sator Jator 2017-01-31 12:56

    Partido Oportunista Vascoren azken ekarpena: Donostiako anbulatorioan hasiko diren azaleko hurrengo espezialistak (5) erdaldun hutsak omen dira. Hala ere, egon seguru zerbitzua euskaraz nahi izanez gero apartheidtu egingo zaituztela zure kasu bereziari arretatsu alternatiba bat bilatzeko… goiko alderdi horren inklusio politika jarraituz, nola ez!

  • Ezin zaie ezta lehenengo perfila eskatu, sikiera. Eta bide batez, oposiziotan, nik gorriz azpimarratuko nuke espainola BIKAIN menperatu behar dela, baita herri honetako nazionalitatea (eta beraz, herritar legala) izateko ere.

    Egon bizkor!
    Aio!

  • Hain eroso bizi dira bere bulegoan euskara teknikari asko! Hain erdaldun dira bere egunerokotasunean euskal sindikatu abertzaleak!

  • Oso eroso baino gehiago, Maialen, oso aspertuta, oso etsita, oso amorratuta bizi gara gure bulegoetan teknikari asko, gure arduradunek normalizazio-lanak noiz aginduko zain, alfer-alferrik. Euskararen aldeko lanean administrazioan aritzeko ez baita soilik gogoa behar, arduradunen jarraibiderik gabe ez baitago jarduterik.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude