Enplegu publikoa eta euskararen meritua

Enplegu publikoa eta euskararen meritua –

Enplegu publikoa eta euskararen merituaAzaroaren 30ean Navarra Televisión katearen II. sari banaketa ospatu zen. Hartan, monologista batek esan zuen: “Orain, oposizioetan, euskaraz jakitea puntuatzen da. Baita Erriberan ere, non ez baitugu sekula hitz egin”. Baina ez zen egia. Erriberan, ordura arte behintzat, enplegu publikorako ez zen sekula puntuatu euskaraz jakitea, ez UPNrekin, ez Gobernu berriarekin. Postu batzuetarako alemanez, ingelesez eta frantsesez jakitea baloratzen zen, baina ez euskaraz jakitea. Azaroaren 30ean bertan, Euskarari buruzko 103/2017 Foru Dekretu berria onetsi zen. Zer ondorio ekarriko ditu euskara meritu gisa puntuatzeko?

Euskara meritu gisa: Kasik aldaketarik ez.

Zaila da mila aldiz errepikatutako gezurrei aurre egitea, baina argi esan behar da: Foru dekretu berriak, oro har, ez du aldaketarik ekarriko alde horretatik. Nafarroako Gobernuaren lan deialdi gehienak oposizioak dira, (azterketa egiten da, baina merituak ez dira kontatzen) eta horietan (oro har) ez dira hizkuntzak puntuatzen. Beraz, orain arteko lan deialdietan euskararen puntuazioa (oro har) ZERO zen, eta hemendik aurrera ere ZERO izanen da.

Oposizio-lehiaketen kasua.

Lan deialdi gutxi batzuk oposizio-lehiaketak dira (azterketa egiten da eta merituak kontatzen dira). Batez ere Osasunbideko deialdiak izaten dira, eta horietan bai, hizkuntzak puntuatzen dira. Osasunbidean zertxobait igo eginen da euskararen puntuazioa meritu moduan. Lehen, baremoko puntu guztien % 3 zen eremu mistoan, eta % 6 eremu euskaldunean. “Eremu ez-euskaldunean” ez zen euskaraz jakitea puntuatzen, eta bai alemanez, ingelesez eta frantsesez jakitea. Orain, berriz, baremoko puntu guztiak batuko dira, salbu euskararenak, eta horren batuketako % 7 dagokio euskarari eremu mistoan eta % 11 eremu euskaldunean. “Eremu ez-euskaldunean” euskara baloratzeko aukera izanen da bakarrik, baina beti baloratuko dira alemana, ingelesa eta frantsesa.

Enplegu publikoa eta euskararen merituaBaremoko portzentajea vs deialdiko portzentajea.

Aipatzekoa da portzentaje horiek ez dagozkiola oposizio-lehiaketa guztiari, baizik eta baremoaren zatiari. Hau da: Osasunbidean adibidez, gehienetan 60 puntu dagozkio azterketari, eta merituei 40. Ba euskararen portzentajeak 40 puntu horiei bakarrik aplikatuko zaizkie. Beraz, praktikan, euskararen egiazko puntuazioa lan deialdi osoaren % 2,8 baino gutxixeago izanen da eremu mistoan, eta % 4,4 baino gutxixeago eremu euskaldunean. “Eremu ez-euskaldunean”, euskaraz jakitea baloratzen bada, % 2,8 baino gutxixeago, eta baloratzen ez bada, horixe: Zero puntu (alemanak, ingelesak eta frantsesak, % 2 bakoitzak).

Ingelesa puntuen % 10 zenekoa.

Goian esan dugu oposizioetan ez direla hizkuntzak baloratzen, baina badira salbuespenak: UPNk, 2009-2015 aldian, ingelesa jakitea baloratu zuen A eta B mailako oposizioetan. Eta, horietan, lan deialdi osoaren % 10 arteko balioa izan zuen. Badago aldea, ezta?

Udal asko, Gobernua baino aise hobeki.

Merituen puntuazioan Nafarroako Gobernuaren jokabideak ez du zerikusirik eremu mistoko hainbat udalen jokaerarekin. Burlatan, euskara puntu guztien % 5ekin puntuatzen da, eta jendearekiko harremana dutenetan, % 10ekin. Antsoainen, berdin. Lizarran, euskara puntu guztien % 6rekin puntuatzen da. Eguesibarren, puntu guztien % 3rekin, eta jendaurreko lanpostuetan % 6rekin. Dekretuak dio udalek erreferentzia moduan har ditzaketela Nafarroako Gobernuak ezarritako puntuazioak. Eskerrak ez dituen behartzen.

Enplegu publikoa eta euskararen meritua  Enplegu publikoa eta euskararen meritua  Enplegu publikoa eta euskararen meritua
enplegu publikoa, Enplegu publikoa eta euskararen meritua, euskara, nafarroa
Joseba Otano

Administrazioan Euskaraz Taldea

3 pentsamendu “Enplegu publikoa eta euskararen meritua”-ri buruz

  • euskaragara.net

    Kaixo,

    Eskerrik asko zure artikuluagatik!

    Oker ez banabil, Nafarroan B1, B2 eta C1 mailaren arabera ematen dira puntuak.
    Uste duzu A1 eta A2 mailagatik punturen bat ematea egokia litzatekeela? Errazagoa izanik, errazagoa litzateke hiztun berriak ikastera animatzera. Ze uste?

    • Joseba Otano
      Joseba Otano Villanueva 2018-01-07 22:23

      A1 eta A2 mailak baloratzen dira. Hauxe dio Dekretuak:

      “Merezimendu moduan baloratzea

      40. artikulua. Euskarari buruzko tituluak edo ziurtagiriak baloratzea.

      1. Hizkuntzen Europako Erreferentzia Esparru Bateratuko C1 mailaren pareko ezagutza-maila egiaztatzen duen titulu edo ziurtagiria duenari euskararen ezagutzaren baloraziorik handiena emanen zaio.

      2. Titulu edo ziurtagiri hori izan ezean, Hizkuntzen Europako Erreferentzia Esparru Bateratuaren A1 maila izanez gero, gehienez eman daitekeen puntuazioaren 1/5 jasoko da; A2 maila izanez gero, 2/5; B1 maila izanez gero, 3/5; eta, B2 maila izanez gero, 4/5”.

      Dena den, Nafarroako Gobernuan bederen, pizgarri gutxi du euskara ikasten jartzeak. Nik uste dut ikasten dutenek euskaltzaletasunarengatik egiten dutela eta ez puntuazio eskas horiengatik. Udaletan, bai, puntuatzen da gehiago.

      • euskaragara.net

        Mila esker informazioagatik.

        Bai, egia da euskaltzaleek ikasten dutela, baina askorentzat aliziente itzela da. Zerbait gehigarria lortzea oso motibagarri da. Balio eta prestigio ekonomiko eta laborala ematen dio oposizioetan eskatzea.
        Erdaldunentzat berdin, baina kasu honetan lehen kontaktua egitea da gakoa.

        EAEn ez da A1 edo A2 baloratzen oposizioetan eta nik uste hori okerra dela. Beraz, Nafarroan egitea garrantzitsua da.

        Gora Nafarroa euskaldun! Segi gogor zuen lanarekin. Eutsi!

Utzi erantzuna

Zure e-posta helbidea ez da argitaratuko. Beharrezko eremuak * markatuta daude