Eskozian SNP eta Eskoziako Berdeen artean 69 parlamentari dituzte, gehiengoa dira, horrenbestez. Horri esker jarri dute martxan erreferenduma, eta gehiengoa izateak eman die zilegitasuna ere, Cameron galdeketa baimentzera behartuz.

Katalunian ere, galdeketaren aldekoak gehiengoa direla erakutsi dute beste behin.

Bien bitartean, EAEn, legebiltzarkideen %60a da EAJ edo EH Bildukoa. Hala ere, adostasun falta tarteko, oraindik Eskoziatik urrun gaudela dirudi. Osoigo webgunean eta Eskoziako erreferendumaren harira, horren zergatia zein den galdetu diote Iñaki Anasagasti (EAJ) eta Juanjo Agirrezabalari (EH Bildu).

Iñaki Anasagasti, EAJko senataria:

“Atzean geratu gara 50 urtez ETA izan dugulako. Indarkeria eta terrorismorik gabeko Euskadi bidean den herria zatekeen.

Zorionez, Ezker Abertzaleak irtenbide armatua baztertu du, eta orain jakin dute badagoela emantzipazio prozesuak  politikoki, bozaren, hitzaren edo erresistentzia pasiboaren bitartez, martxan jartzea. Indar metaketa hortik etorriko da, baina beharrezkoa da ETA behin betiko desagertzea”

Juanjo Agirrezabala, EH Bilduko legebiltzarkidea:

“Cameron ez da Rajoy, eta Londres ez da Madril. Britania Handiko gizarteak espainiarra baino helduagoa eta demokratikoagoa dela erakutsi du. Izan ere, erabakitzeko eskubide gehiagok demokrazia gehiago dakar. (…) Aukera bakarra dugu: gure bide propioa egitea herri gisa. Horretarako lidergoa, konpromisoa eta erabakitze eskubidearen aldeko gainontzeko alderdi eta erakundeekin akordioak behar ditugu.

EA eta EH Bildu horretarako prest gaude. Eta EAJ? Badirudi ezetz. Bi aldeko bidearekin tematuta daude, Rajoyk gure herriarentzat duen agenda aldebakarrekoa den arren”