“Pertsonak helburu” ala aitona-amonak negozio?

“Pertsonak helburu” ala aitona-amonak negozio? –

“Orain pertsonak”, orain Egogain!

EAJk agintzen duen Gipuzkoako Foru Aldundiak kanpora begira eman nahi duen irudia honako hau da: modernoa, garai berrietara egokitua, lurralde aurreratua, berdintasunarekin inplikatua, kontziliazioaren aldekoa, pertsona helburu… Bide horretan badu zer eginik ordea! Errealitatea deskribatzetik oso urrun dauden hitzak baitira. GFAk kudeatzen duen Egogaineko nagusien egoitza da honen adibide.

“Pertsonak helburu” ala aitona-amonak negozio?Egogain, Eibarren kokatzen den egoitza da, bertan pertsona nagusi, mendekotasun handia, adimen urritasuna eta gaixotasun mentalak dituzten pertsonak artatzen ditugu, guk, zaindu eta maitatu egiten ditugu, gehienek hemen egingo baitituzte beraien bizitzako azken urteak, behar duten bizi duina eta merezi duten kalitatezko arreta izan dezaten lanean dihardugu.

Aldundiaren azken urteetako jarrerarekin (Elena Basagoitik egindako adierazpenak horren adibide), Aldundiak pribatizazio eta prekarietateranzko norabidea hartu du, zeinek eta bertan lan egiten dugunon lan baldintzak kaltetuz, instituzionalizaturik dauden pertsonarik zaurgarrienek merezi duten arretaren kalitatea erasaten duen.

Honen adibide dira; langileriaren etengabeko aldaketak, ratio desegokiak, lanpostuen desagerpenak, amortizazioak, CLECE azpikontratetako gaueko lankideei egiten zaien jazarpena (etengabe zigorrak ezarriz e.a.) eta baldintza prekarioak edo instalazio zaharkituak (GUREAK enpresako langileek ikustegian jasan dituzten tenperatura altuengatik berriki salatu dugun egoera) besteak beste.

Testuinguru honetan, berriki irekiko den Unitate psikogeriatrikoan (8. solairuan) gauden langile kopuru berdinarekin irekitzeko asmoa agertu dute, langileoi inongo informaziorik eman gabe eta beldurrezko mezuak zabalduz.

Berdintasunari dagokionez, Egogaineko langileriaren kolektiboa osatzen dugun gehiengoa emakumezkoa izanik, Aldundiak arlo honetan zabalduriko mezuak propaganda hutsa direla iruditzen zaigu: batetik aldundiak berdintasunaren aldeko apustua egiten ari dela saltzen dio gizarteari; komunikabideetatik alegia, baina bestetik, aldundiko langile garen eta Egogainen lan egiten dugun emakumeok egoera guzti honen jomugan jartzen gaitu. Berdintasunaren mesedetan hedabideetan zabaldutako hitz horiek guztiak gezur hutsa besterik ez direla deritzogu. Kalean uso, etxean otso!

Honen adibide garbia da haurren zaintzagatik lanaldi murrizketa metatuak ukatu izana. Eta, era berean, gure kategoria profesionala “Erizain Laguntzaile” izatetik “Zaintzaile” izendapena izatera aldatzea.

Hau da, gure lana gutxietsi eta desprofesionalizatu egin du Aldundiak. Erizain Laguntzailearen funtzioak bete eta “Zaintzaile” izendapena jarriz. Gipuzkoako Foru Aldundiak ez bezala, Bizkaiko eta Arabako Aldundiek, “Erizain Laguntzaile” kategoria aitortzen die langileei guk egiten dugun lan berdina egiteagatik. Aldundia egoera honen jakitun da aspalditik, baina eskaera historikoa den honi muzin egiten dio. Dagokigun izendapenaren onartzeak, egindako lanaren aitortza eta etorkizunerako garapen profesionalaren bermatzea ekarriko liguke. Kalitatezko zerbitzuaren mesederako.

Aurreko paragrafoan aipatutako honek, “Kabia”-ri ematen ari zaion ereduak eta gure etorkizun profesionalarekiko ezjakintasunak garrantzia handia du Aldundiko langile izandako oso profesionalak diren lankideen joatea eragin duelako eta Egogain, azpikontraten negozio eta paradisu bilakatzea ahalbidetzen duelako.

EAJk gizarteari eslogan eta irudi politekin saltzen digun ereduaren atzean, “pertsona helburu” duen horretan, zaurgarritasun egoeran egon gaitezkeen edonori prekarietaterantz garamatza. LABen iritziz aurreko gai hauei irtenbidea eman behar zaie, zerbitzu publikoak garatuz, langileon baldintzak hobetuz eta pertsona zaurgarrienen kalitatezko arreta integrala bermatzeko. Guztiok zerbitzu hauen erabiltzaile izan gaitezke eta. Horregatik, LABetik gizarte eragile, langileria eta erabiltzaile diren senideei hastear dauden ekimenetan inplikatzea eskatzen dizugu.

 

Gipuzkoako Foru Aldundiko LAB Egogaineko langileak

Iñaki Mariskurrena

Itziar Barruetabeña Uralde

Eire Blanco Sarriugarte

Joseba Alvarez

“Pertsonak helburu” ala aitona-amonak negozio?
“Pertsonak helburu” ala aitona-amonak negozio?
eibar, erresidentziak, osasungintza, zaintza, “Pertsonak helburu” ala aitona-amonak negozio?

2 pentsamendu ““Pertsonak helburu” ala aitona-amonak negozio?”-ri buruz

  • Bizkaian erizainrza laguntzaie teknikari bati Gerocultor/a kategoria profesionala ematen zaio nagusi egoitza askotan. Arrazoia: Gutxiago ordaintzeko. Esan behar dut, lan postu hauetan instrusismo laboral asko dagoela. Erizain laguntzaile teknikari batek titulatu ofiziala da Gerocultor/a ordea askok zihurtagiri profesional bat dute edo enpresa bateki balio ez duen titulua. Nagusiekin lan egiteko ezinbestekoa da: Erizain laguntzaile teknikaria edo menpekotasun egoitzetan dauden teknikaria izatea. Erizain laguntzaile batek nagusi egoitzan, ospitalean edo beste esperru askotan lan egin dezake. Menpekotasun egoitzetako teknikariak ez ordea. Gipuzkoan oran Kabiaren menpe egongo dira udal egoitza guztiak 2019an, udal egoitza guztiak Kabiaren menpe egongo dira. Prekarietatea. Bizkaian Azpiegiturak S.A foru aldundiko enpresak begirale gisa nagusi egoitza asko ditu. Baina hauen eguneroko kudeaketa enpresa pribatuek egiten dute. Azken hauen azpikontratazioa egiten dute adibidez, garbiketa zerbitzuan, arropa garbitze zerbutzuetan.

  • EAJ, ZUEN KABIA, GURE KAIOLA!

Utzi erantzuna

Zure e-posta helbidea ez da argitaratuko. Beharrezko eremuak * markatuta daude