Proposamen horretara iristeko ele biko ikastereduen azterketaren barruan ekarpena bideratu zuen Kontseiluak honako azterketa hauek burutuz: juridiko-legala, soziolinguistikoa, psikolinguistiko eta glotodidaktikoa eta operatiboa. “Finean, Kontseiluaren proposamen nagusia ikasle euskaldun eleaniztunak sortzea eta ikastetxe guztietan hori bermatuko duen eredua abian jartzea da.

Horretarako nahitaezkoa da legea bera lehenbailehen aldatzea”, Paul Bilbao, Kontseiluko idazkari nagusiaren esanetan. Azken urteotan hainbat ikastetxetan garatu dira ikasle euskaldun eleaniztunak sortzeko proiektuak eta horietan guztietan oinarrituz egin zuen Kontseiluak bere proposamena.

“Hortaz, esperimentazioak alde batera utzi, eta EAEko ikastetxeetan Kontseiluak egindako ekarpena ahalik eta lasterren inplementatzeko egiturazko aldaketen aldeko apustua egiteko eskatu nahi dugu”, esan du Bilbaok.”Jakin dakigu ikasle euskaldun eleanitzak sortzetik hurbilen dagoen eredua D eredua dela, hain zuzen ere, etxetik euskara dakartenentzat mantentze-eredua dena, eta, ez dakartenentzat, murgiltze-eredua dena.”

Horrexegatik, Kontseilua eredu horretatik abiatu zen proposamena egiteko. Gainera, kontuan hartu behar da gurasoek aukeratu behar izan dutenean, D ereduaren aldeko hautua egin dutela. EAEko aurrematrikulazio datuak aipatu ditu Bilbaok zentzu horretan. Arabako, Bizkaiko eta Gipuzkoako aurrematrikulaziotik 2 urteko ikasle berrien artean, %75,23k egin dute euskaraz ikastearen alde.

2010eko datuekin alderatuta, bi puntu gehiago. “Ikasle euskaldun eleaniztunak sortzeko badira egin beharreko aldaketak: ebaluazioak, hizkuntza-proiektua aberastea, taldearen osaerari buruzko hausnarketa, irakasleen prestakuntza, Hizkuntza Normalizazio Planaren ezaugarrietan sakontzea… Horiek guztiak jasotzen ditu Kontseiluaren proposamenak, eta gure ustez horietan guztietan jarri behar dugu indarra ikasle euskaldun eleaniztunak sortuko baditugu”, Bilbaoren hitzetan.

ISEIren ikasleen euskara-gaitasun mailaren inguruko emaitzak (2004) ere aipatu ditu Kontseiluko idazkari nagusiak. “Denbora pasa da ISEIk ikasleen euskara-gaitasun mailaren inguruko emaitzak argitaratu zituenetik, eta elementu kezkagarri asko ondorioztatu ziren. Horrek ekarri zuen, neurri batean, egun indarrean dauden ereduen inguruko eztabaida sustatzea. Halaber, testuinguru horretan jarri nahi izan zuen Kontseiluak mahai gainean ikasle euskaldun eleaniztunak sortzeko proposamena”.

Urteak igaro dira ordutik, eta “ez da ez lehen, ez eta orain ere, erabaki irmorik hartu ikasle euskaldun eleaniztunak bermatuko dituen hezkuntza sistemarantz jotzeko. Hizkuntzen berreskurapen-prozesuan belaunaldi berriak hizkuntza gutxiagotua jakitea oinarrizko zutabea da. Ekin diezaiogun, beraz, etorkizuneko gazteak euskaldun eleanitzak izateko bideari”, azaldu du Bilbaok.