Makila bahituaren istorioa

Makila bahituaren istorioa –

Jon Barberena baztandarrak fineziaz idatzitako artikuluska batean salatzen du euskaldonok gero eta hegoalderago dagoen xilko borobilari, zilborrari, begira bizi garela. Ados poeta baztandarrak adierazitakoarekin. Horren adibide bat, makila bahituaren istorioa dugu. 

Makila bahituaren istorioaMugaz bertzaldean bizi den Andoni Rene Iturrioz, euskaltzale suharra, Senpereko Larralde baserriko jabea da. Haren eskuzabaltasunari esker Larralde baserria Bertsularien lagunen egoitza da, hainbat artelanen erakusteko tokia eta baita Hatsa poesiaren ekimenean parte hartzen duten olerkarien aterpea ere.

2017ko irailaren 3an, Amaiurretik abiatu eta Senpererako bidean, Otsondon, Foruzaingoak Andoniren furgoneta geldiarazi, arakatu eta Andoniren aitonaren makila, armatzat hartuta, kendu egin zion. Mende bat baino zaharragoa den makila, Andoniren aitonarena. Foruzaingoak Espainiako Gobernuaren Iruñeko ordezkaritzara salaketa igorri zuen, eta Guardia Zibilaren Servicio de Intervención de Armas y Explosivos delakoak arma arriskutsutzat jo zuen. Harrezkeroztik, Foruzaingoak Elizondon duen komisaldegian dago bahituran —edo “atxilotuta”—.

Andonik aitonaren makila berreskuratzeko orain arte egindako saiakera guztiak, alferrikakoak.
2018an Andonik makila itzultzeko eskatu zion ordezkaritzari, makilari puntzoia kentzeak ekar dezakeen gastua bere gain hartzeko prest dagoela adieraziz.

Andonik oraino ez du makila berreskuratu eta Elizondoko komisaldegian dago, hautsa biltzen. Andoni Iturriozen makilaren istorioa absurduaren adibide bat da. Ez gaitezen harritu beraz, Iparraldeko batzuek pentsatzen badute Hegoalden, geure zilborrarri begira, iparra galdu dugula.

Makila bahituaren istorioa
Makila Elizondoko komisaldegian (Argazkiak: Noticias de Navarra)

 

[Euskalerria Irratiko Metropoli Forala saioa, ‘Minutu bateko manifestua’, 2019ko maiatzaren 22koa]

Makila bahituaren istorioa
Josu Jimenez Maia

Iruñean sortua, 1967an, baina aspaldi Berriozarkotua. Idazlea. Narratiban, hainbat ipuin ditu sarituak eta argitaratuak, besteak beste, Tene Mujika lehiaketa, Orixe saria, Iparragirre saria, Atarrabiako Petri saria eta beste hainbat. Haur eta Gazte literaturan, Johanes, Bargotako Aztia liburua, (Txalaparta) eta Hiru Miru album ilustratua (Denonartean). Olerkigintzan, bi haiku-bilduma, Gerezi garaiko haikuak liburua (Maiatz) eta Orbel Azpiko Haikuak (Denonartean), baita olerki solteak ere Muxugorri antologian, Luces y sombras eta El Coloquio de los perros-en. Ohiko kolaboratzailea Nafar Ateneoaren "Constantes Vitales" aldizkarian, "Maiatz" aldizkarian eta "Hatsa" olerki bilduman ere. Artikuluak ere, ehun ta berrogeita hamar baino gehiago ditu argitaratuak han-hemenka. Itzultzaile gisa, Noriko Matsui-ren "How to perform kamishibai" eta "Ryookanen 101 haikuak" liburuen itzultzailea.

Zer duzu buruan “Makila bahituaren istorioa”-ri buruz

Utzi erantzuna

Zure e-posta helbidea ez da argitaratuko. Beharrezko eremuak * markatuta daude