Lehen lerroa

Lehen lerroa

Hau irakurrita batek baino gehiagok leporatuko digu hurrengoak etxe barruan esateko hitzak direla, baina ez dugu horretarako gunerik aurkitzen eta egoera hau bakoitzak bere modura isilean eramanez gero, okerrera baino ez du egingo. Beraz, publikoan egitea erabaki dugu, leihoak irekiz haize freskoa sar dadin. Anonimotasunarengatik ere kargu hartuko digute, baina garbi utziko dugunez, ez dugu honetaz hitz egiteko askatasuna sentitzen.

ETAri “ez suntsitu gure kapital politikoa, guk hobeto egingo dugu” esan ziotenean ez genuen uste gure kapital politikoa hobeto suntsitzeaz ari zirenik.

Euskal nazio askapenerako mugimenduaren kapital politikorik handiena eta preziatuena ez dira izan ez instituzioak, ez erakundeak, ezta armak edo barrikadak ere: gure kapital politikoaren elementu nagusia jendea izan da. Euskal Herriko auzo galduenetik munduko beste puntura ehundutako pertsona sare sendo bezain malgua, aldaketekin batera aldatzen zena herriaren pultsua bere pultsua zelako, herriaren kontraesanak bere kontraesanak zirelako.

Sare horren lotura askoren ahultze eta desagertzea ez da bart gaueko kontua. Ez da hasi, noski, azken “prozesuarekin”, askoz lehenago baizik. Baina batzuk uste genuen hori zela, hain zuzen ere, prozesu santuaren lehenengo betebeharra: gure estrategiaren erdigunea jendeari itzultzea. Oker ginen antza. Otoitzen musika eta letra aldatu da baina apaizek pulpituan jarraitzen dute, kanpoan gertatzen denari gehiegi erreparatu gabe, bere mantra errepikatuz.

Nork eta zertarako erabaki zuen atez atekoa herri guztietara zabaltzea solemnitate osoz iragartzea Bilduren bandera bilakatuz, guztiona izan zitekeen irtenbide on baten aurka ezker abertzalearen aurkako indar guztiak esnatuz? Nork eta zertarako erabaki du, udaletan dauden kideak gerra baten erdian sartu ondoren, gutxienezko helburuak betetzen ez dituen sistema bat adostea PSErekin Donostian? Nork eta zertarako erabaki du gure herriaren ukazioaren sinboloen inposizioa onartu eta gauzatzea udaletan? Nork eta zertarako erabaki du ukazio horren kontra bizitza utzi duenaren oroigarria kentzea Oreretan? Nork eta zertarako erabaki du konponketaren atalean lehentasun osoa izango zuen presoen afera ez dela hain lehentasunezkoa?

Zerrenda luzea izan daiteke eta orokorrak direnaz gain tokian tokiko ekarpenekin osa daiteke baina ondorioa bera da: garai batean barne borroka ideologikoa altxorra zuen mugimendu bat desadostasuna jasaten ez duen lagun koadrila bat bilakatu dela ematen du, azalpenik gabe egin eta desegiten dutenak, gizarte azterketa ahaztuta, eta hauteskundeei begirako unean uneko trapitxeo instituzionalari emanez.

Baina lasai, horrela jarraituz gero ez da askoren beldurra beteko, ez baitugu “PNV bezala bukatuko”. Askoz okerragoa izango da. Izan ere, EAJk, beste nazioetako burgesien ordezkari guztiek bezala, ezin hobeto hartzen dute aintzat  jendea… beraien aurka egiteko bada ere. Horregatik ezkutuan homologazio sistemikoarekin amesten duten burges txikiek ere badute kezkatzeko arrazoirik: jendea aintzat hartzen ez duen ezker abertzalearen lehen geltokia asimilazioa eta atomizazioa izango delako, baina hurrengoa ezereza.

Utziko al diegu? Barne borroka ideologikorik gabe ez dago aldaketa politikorik eta bihar berandu izango da. Kideak bilatu, antolatu eta eztabaida piztu. Izan zirelako gara eta garelako izango dira… edo ez. Gure esku dago.

Lehen lerroa

13 pentsamendu “Lehen lerroa”-ri buruz

  • Peru Dulantz 2013-05-24 15:05

    Ez dakit, bada. Deskribatzen duzun hori guztia, berria al da? Hau da, noiz erabaki dira gauzak denon artean, guztion partaidetzarekin? Lehen bestelakoak ziren gauzak? Benetan? Nik dakidala, beti izan dira erabaki-gune batzuk zeinetan guztiek ez baitzuten esku-hartzerik. Hala ere, ez dut esan nahi hori onena denik, beti horrela izan dela baizik.

  • Xabier Makazaga 2013-05-24 17:34

    Barneborrokak horrela bideratzen zituztenak zer ziren lehen? Zer esaten zenituzten haiei buruz? Ba, horixe. Nik zuei buruz beste horrenbeste esateko eskubide osoa dudala. Batzuk galtze txarra izan zuten garai batean, baina beste batzuk ez dakit ez ote duten okerragoa gaur egun. Non zabalduko, gainera, horrelakoak eta ZuZeun. Bejondeizuela! Eta ez dut ezertxo ere gehiago esango, ez baita hau inondik inora leku egokia halako eztabaidatarako. Agur!

  • Amonamantangorri 2013-05-24 18:21

    “… garai batean barne borroka ideologikoa altxorra zuen mugimendu bat, desadostasuna jasaten ez duen lagun koadrila bat bilakatu dela ematen du”.

    BARKATU? Non eztabaidatu ziren Oldartzen Ponentzia famatua, Leitzarango autobiaren hasierako priektuari ezetz esan ondoren Lurraldea plataformaren alternatiba defendatzea; ETAren basakeriak oro, edozein izanda ere, “gatazkaren ondorio”-tzat definitzea; Lizarra-Garazi akordioa…?

  • BarneBorroka 2013-05-24 18:26

    @Peru: Ez dugu inolaz ere iraganaren apologia egin eta hala ulertu bada, kale egin dugu. Garbi adierazi dugu planteatzen dugun arazoa, jendea aintzat hartzen ez duen ezker abertzalearena, ez dela Zutik Euskal Herriarekin jaio. Iraganean gauza batzuk (askoz) hobeto eta beste batzuk (askoz) okerrago egin izan dira, baina uste dugu egun bizi dugun barne basamortu ideologikoak ez duela parekorik ezker abertzalearen historian.

    @Xabier: azkar kokatu gaituzu zure eskemaren txokoren batean, baina oker zabiltza: hau idatzi dugunok ez dugu sekulan inor seinalatu bere iritziak emateagatik. Galtzeari dagokionez ere kale egin duzu berriro: estrategia aldaketaz ari bazara, gogoz eta ilusioz hartu genuen eta horrela bizi dugu oraindik ere. Zure iruzkinak ederki laburbiltzen du mahaigaineratu nahi izan dugun arazoa: ????? batzuk gara, galdu dugu eta eztabaida ezin da publikoa izan. Bejondeizula zuri ere. Guk eztabaidarako askatasuna, denok irabaztea eta eztabaidarako gardentasuna aldarrikatzen dugu. Besteen desberdinak bagara, zergatik ez hasi hortik? Zergatik izan behar dute eztabaida politikoak pareten artean egin beharrekoak?

  • Erroberto Michels 2013-05-24 22:39

    Edozein erakundetan bezala, ezker abertzalean ere agintzen dutenek badakite zer eztabaidatu behar den, noiz eztabaidatu behar den eta guztioi komeni zaiguna zer den (eurek agintean jarraitzea ahalbidetzen duen edozer).
    Eztabaidak zergatik egin behar dira lau hormen artean eta aginteak ezarritako aldintzetan? Aginte horrek guztia kontrolatu beharra daukalako. Baita eztabaidaren garapena eta emaitzak ere.
    Duela mendea baino gehiago utzi zuen hori guztia idatzita Robert Michels lagunak, “oligarkiaren burdinezko legea” zehaaztu zuelarik. Eta zinez asmatu zuen.

  • Xabier Makazaga 2013-05-24 22:43

    Artikulu hau 14 :10etan jarri duzue hemen eta hara zer iruzkin jarri duen I. Larreak bederatzi minutu geroago Borroka Garaia Da! blogean:
    ZuZeun agertutako artikulu kritiko bat:
    “Lehen lerroa”
    https://zuzeu.eus/2013/05/24/lehen-lerroa/
    Batzuk azkarrak dira benetan !!!

    • Kaixo X. Makazaga.
      .
      Zure azken iruzkin honek harrapatu nau idazten hemen sartzeko beste bat. Zehaztu dezakezu zer adierazi nahi duzun?

  • Xabier Makazaga 2013-05-24 23:09

    Bai, Larrea, gustura asko zehaztuko dizut. Aski duzu horretarako birritan eman nizun ene e-lbidera idaztearekin. Beltzak bezala, buruz-buruko eztabaidei ihes egiten badiezu, ordea, jakinminarekin gelditu beharko duzu.

    • Bufff, bueno, lehendabizi kaka publikoki botatzen didazu eta gero pitokeriak erantzuten.

      Saiatuko naiz idazten ari naizen iruzkina amaitzen, eta zuk hobe zure nerbioak kontrolatzen badituzu.

  • Gonzalo Etxague

    Egia esan, artikulu hau txokolatezko tarta handi-handia bezalakoa da: jaten hasi nahi bai, baina ez dakizu non hasi, hain da erakargarria haginak nonahi sakontzeko! Barruan amua daukala jakina da, baina tarteka marrazoak sardinentzako amuak irentsi ditzake lasai. Edo bestela esan, trollei jaten eman, horrela geu ere elikatzen baikara. Ez dugu ukatuko. Baina goazen amuari heltzera!
    Badago esaldi bat: . Pako Aristiri lapurtutakoak direla dirudi, pluralean, bai kakotsen artekoa, bai bestea, biak Aristirenak, oso denbora gutxian batetik bestera pasatu baita gizona. Jon Juaristi eta Rosa Diezen kasuetatik Euskal Herriak bizi izan duen konbertsiorik aipagarriena. Baina hau ez dator harira, barkatu.
    Kontua da gure lagun anonimoak horrelako esaldia bota ondoren, oraingo “nagusiei” erabakiak hartzeko eztabaida eta askatasun eza leporatzen dio! Horrelako esaldia bota ondoren, aizue!, artikulu oso bat erabakiak nork eta zertarako hartzen dituen galdetzeko! Aurreko erreferentzia ETA delarik! Ez du kritikatzen erabakiak zuzenak diren ala ez, nork eta zertarako hartzen dituen galdetu baizik!
    Agian gure lagun anonimoak lehen biltzarrerako deia jasotzen zuen ETAren partetik; areago, ETA gure lagun anonimoaren zain egoten zen erabakiak hartzeko, bere iritzia ezinbestekoa zelako herria askatzeko. Nolabait esateko, inportatentea sentitzen zen gure lagun anonimoa. Auskalo!
    ETAz asko esan liteke, baina herritarren erabakiak, gomendioak, iradokizunak edo kritikak jasotzeko oso irekia ere ez zen. Gure lagun anonimoa, ordea, orain sentitzen da etsita, frustratua inork kasurik egiten ez diolako, penak nori kontatu ez daukalako. Nik uste dut lehen banguardia sentitzen zela, ilusio horretan bizi zela gure lagun anonimoa, eta orain konturatu dela hutsaren hurrengoa dela.
    Agian horregatik gordetzen du nortasuna gure lagun anonimoak, lotsagatik, ez askatasunik ez duelako. Logikoa litzateke: horrelako tontakeriak esateko Pako Aristik hitzaldia ematen du astero, eta egunez egun izen ona galtzeaz aparte, beste arazorik ere ez dauka. Baina, antza denez, gure lagun anonimoa Bildukoek zaborra gaizki biltzeagatik isuna jarriko dioten beldur da. Bestela, zergatik ezkutatzen du du nortasuna? Zergatik hitz egiten du plural maiestatikoz aita santuak bezala?
    Baina gure lagun anonimoak akats larria egin du anonimotasunak ematen zion sinesgarritasun eskasa akabatzeko. Irakur ezazue esaldia: “Nork eta zertarako erabaki zuen atez atekoa herri guztietara zabaltzea solemnitate osoz iragartzea Bilduren bandera bilakatuz”. Bilduren bandera bilakatu? Baina orain nork egiten du kriita ETAren zilegitasuna aldarrikatu ondoren: EAk, Ezker Anitzak, Aralarrek, EAJK…? Nola liteke testu berean ETAren zilegitasun demokratikoa gogoratzea eta Bilduren izen ona defendatzea?
    Esan bezala, txokolatezko tarta bezalakoa. Izan ere, testu anonimoen argudioak oso eskasak izan ohi dira. Horregaxegatik dira anonimoak.

  • Amonamantagorrik “Non eztabaidatu ziren Oldartzen Ponentzia famatua” galdetzen duenez, nik erantzuten dut:
    .
    Oldartzen Txostena nazio mailako eta herriz herriko batzarretan eztabaida ireki batean eztabaidatu zen, eta beste txosten alternatibo batekin lehiatu zen: IRATZARekin, hain zuzen ere. Zuzenketak aurkeztu ahal izan ziren eta banan banan bozkatu ziren. Bozketak egin ziren eta datu publikoen arabera herri batzarretan parte hartu zuten 5.322 lagunen %71ak eman zuen OLDARTZENen aldeko botoa. Bilatu interneten eta aurkituko duzue (nik El País, 1995-03-03an aurkitu dut. Ez dut lotura jartzen bat baino gehiago idazten bada iruzkina ez delako automatikoki ikusten).
    Beraz, ez dakit Amonamantangorrik oso adibide egokia hartu duen egungo estrategiaren alde egiteko.
    .
    Oso bestelakoa da Zutik Euskal Herria txostenaren metodologia. Eztabaidatu zen txosten bakarra Batasunaren zuzendaritzak aurkeztu zuena izan zen (Mugarri desagertu zen bapatean), ezin zen zuzenketarik aurkeztu, ez zen bozkatu eta behin betiko idazketa “jakintsu talde” batek egin zuen.
    .
    Zergatik aurka geunden batzuk parte hartu genuen ? Gezur batekin ziria sartu zigutelako; “ezker abertzalearen erakunde guztiak ados daude” gezurrarekin hain zuzen ere. “Galtze txarra” dugula? Kar, kar…. bejondeizuela, txapeldunak !! Ez dut halako garaipenik nahi !!
    .
    Halako eztabaidak gune publikoetan agertzen diren guztietan beti dago norbait oso sen onarekin esaten duena “hau joko zikina da, barruko kontraesanak barruan eztabaidatu behar dira”, eta ados nago….. teorian.
    Ze gauzak zer diren; “barneborroka”k egin duena kritikatzen duten batzuk eskuak apurtu arte txalotzen dituzte beste aldetik egin diren askoz “strep-tease” publiko larriagoak.
    Eta barruko kontraesanei dagokionez nire bizitzan ikusi dudan agerraldi publikorik nazkagarriena aipatuko dut, berriro, hemen; Bateragune epaiketan Otegik eman zituen barruko azalpen guztiena zehazki. Dozenaka kamera eta kazetari aurrean; “guk lortu dugu borroka armatuarekin amaitzea. ETAk eta EKINek jarraitu nahi zuten” (EKINeko inputatua ondoan jesarrita zeukalarik) leloa landu zuen hainbat egunetan, Gara-n osagarriak ziren kronika eta barruko datuekin lagunduta, noski. Orduan jakin genuen zehatz-mehatz ofizialki Zutik Euskal Herriaren adar jotzearena, besteak beste. Otegi harro harro kontatu zigun telebistaren pantailatik. Batzuk ezin genuen sinistu ikusten ari ginena.
    .
    Eta egun horietako egunkarietako kronika guztiak irakurri nahi ez duenarentzat hona hemen Xabier Lekuona kazetariak poz pozik idatzitako kronika laburra (“Hasi da barne eztabaidaren kontaketa” tituluarekin), bertan Otegiren jarrera txalotzeaz gain honako hau esaten du:

    “BATERAGUNE auzia ere bere barne lehian erabiltzea erabaki du gaur egun ezker abertzalean nagusitasuna duen sektoreak, egunotan Auzitegi Nazionalean epaitua izan den horrek hain zuzen. Otegik inoiz baino argiago eta ozenago aldarrikatu du sektore horren eta ETAren artean dagoen leizea. Otegiren ahotik ikasi du iritzi publikoak Bateragune Ekineko egitura bat zela. Ekinek eta ETAk posible ikusten zutela metaketa soberanista eta jardun armatua bateratzea; Otegi, Rafa Diez eta Rufi Etxeberriaren taldeak ez…..
    … Urratsez urrats ehundu den garaipena da eta, antza, komeni da kontatzen hastea. Bateraguneko auzipetuak eta lekukoak hasi dira hainbat pasarte aletzen eta, besteak beste, joan den igandean Gara-k ere eskaini du bere ikuspuntua, Iñaki Altunak sinatutako artikulua medio…..”.
    .
    Kontutan hartzen badugu adostuta eta prestatuta zegoela Bateragune epaiketa Estatuaren kontrako Burgoseko Prozesuaren antzeko bat izango zela, eta Otegik eta bere taldeak ETA eta estrategia politiko-armatuaren aurkako epaiketa bilakatu zutela munduko komunikabide guztien aurrean …… ze garrantzia dauka ZuZeu-n edo beste blog txikietan barruko kontraesanak agertzeak? Ados nago, ez genituzke agertu beharko, baina gure “Lehendakaria”k” eta bere taldeak bai egin dezaketen mundu guztiaren aurrean? Eta zergatik txalotzen edota zuritzen duzue Otegik egindakoa “BarneBorroka”rena kritikatzen duzuen bitartean?
    .
    Benetako demokrazia batean biziko bagina ados nengoke askotan proposatzen den asanblearismoarekin, baina zapaltzailea diren bi Estatuen menpe gauden bitartean hainbat erabaki ezin izango dira batzarretan hartu. Ez aurreko estrategiarekin ez honekin, Estatuentzat arazoa garen bitartean, noski. Eta “BarneBorrokak” kontrakoa pentsatzen badu ere hau bezalako gune publikoetan ezin izango da inoiz gauza batzuk esan. Hona ere heltzen da gure zapaltzaile eta beren kolaborazionisten begi handia, eta haien legeen ezarpena.
    Gakoa, eta gure kontraesan nagusiena da, nire ustez, nora goazen estrategia honekin.
    .
    “BarneBorroka”ren artikulua irakurri nuenean zalantza batzuk geratu zitzaizkidan, eta 18:26an idatzi duen iruzkina irakurri eta gero argiago daukat ez nagoela ados hainbat puntutan, baina, deigarriena amaiera egin zait: “Kideak bilatu, antolatu eta eztabaida piztu” dionean. Deialdi bitxia iruditzen zait. Garai hauetan herri bakoitzean potro/obarioetaraino gaudenok ezagutzen dugu elkar eta eztabaida piztuta dago. Nor bilatu behar dugu?
    .
    Benetan interesatzen zaidan gaia da, baina orain denboraren aldetik mugak dauzkat; ez dut uste erantzun ahal izango dudanik gaurtik egun pare batera.
    Ondo segi.

  • Ba bai Larrea jauna, auzo eta herri batzarretan ibili ginenok badakigu zelako tranpak egin zituzten zuzendaritzatik. Horregatik halako eztabaidak agertzen direnean presaka etortzen dira esatera hau ez dela leku aproposa horren inguruan mintzatzeko, mintzatuz gero asko baitaukate galtzeko. Baina bestetik ere egia da gehiengo argi batek txosten ofizialaren alde bozkatu zuela, alde batetik ez zegoelako beste txostenik eta bestetik gazte antolakundeko jende asko ez zelako pasatzen batzarretatik.

    Beste prozesuetan ez bezala txosten edo ponentzia bakar baten inguruan egin zen eztabaida, lehendabiziz ezker abertzalearen historioan. Ez dut eztabaidatuko erabakia demokratikoa izan zen ala ez, baina argi dagoena da Ezker Abertzalean egin den prozesurik antidemokratikoena izan zela.

    Dena den halako eztabaidetan denbora galtzeak ez du gehiegi merezi, hobeto gaurkotasunaren inguruko solasaldiak egitea. Kontextu honetan kokatu behar dugu borroka ideologikoa, bakoitzak bere lekutik tiraka. Zentzu horretan “galtzaileek” ere badute eskubidea heuren ikuspegia agertzeko, edota antolatzeko.

  • BarneBorroka 2013-05-25 10:27

    Zehazten: ez dugu planteatzen eztabaida bat bi estrategien artean. Mahai gainean jartzen dugun arazoa aurreko estrategian betidanik egon da hor gradu desberdinetan eta estrategia berriarekin ez du konpontzeko zantzurik.

    Horren erakuslea da hemen bertan eta eztabaida askotan oraingo estrategiaren defendatzaile sutsuek agertzen duten jarrera: “beti izan da horrela”, “zuek berdina egiten zenuten”… Iraganeko eztabaidetan ez galtzeko, demagun baietz, horrela zela: non dago bada aldaketa? Oraingoaren protagonistetariko batzuk ez dira beti hor egon ala? Zeintzuk dira guk-zuek hori beraz? Eredu beraren botere aldaketa hutsa izan al da? Badakigu eredu horrek zer ekarri digu borroka armatuarekin? Bera amaitzeari buruzko eztabaidan sartu gabe, hura gabe ekarriko diguna hobea izango al da?

    Jendea aintzat hartu gabe politika egin nahi duenak porrot egingo du. Eta “aintzat hartu” esaten dugunean, zehazte aldera eta eztabaidak ez nahasteko, ez gara demokraziaz ari, eraginkortasun estrategikoaz baizik: berriro diogu, kapitalari ez zaio jendearen iritzia axoa demokratak direlako hain zuzen ere, baina beti hartzen du aintat jendea.

    Horregatik galdetzen dugunean “nork eta zertarako” hartzen dituen erabakiak, ez da gure hitzaren balioa kezkatzen diguna, zertan oinarritzen diren eta zein helburuekin hartzen diren ez jakitea baizik; besteak beste, gu, oinarrikook, garelako estrategia hori gizarteratzeko tresna nagusia.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude