Larunbateko manifestaziora joateko deia egin dute zigortuak izan diren Altsasuko EHEko bi kideek

Seinale batzuk ezabatzea leporatuta jasan beharreko 6.000 euroko zigorra eta bi eguneko etxeko atxiloaldiaren aurrean, “epaiari buelta ematea” ipar, “Euskal Herri euskalduna eraikitzen jarraitzeko” aste osoko egitarau zabala prestatu dute Altsasuko EHEko kideek. Tartean da “Euskaraz bizitzeari zigorrik ez! Ezabatu eta euskaraz bizi” lelopean larunbatean egingo den manifestazioa. “Euskaltzale konprometitu eta aktibo gisara” lanean jarraituko dutela berretsi dute.

Larunbateko manifestaziora joateko deia egin dute zigortuak izan diren Altsasuko EHEko bi kideek

Seinale batzuk ezabatze leporatuta 6.000 euroko isuna ordaintzearekin eta 48 orduko lokalizazio iraunkorrarekin izan dira zigortuak Altsasuko EHEko bi kide. Astebukaeran dira betetzekoak bi eguneko etxeko atxiloaldia. Horren harira agerraldia egin zuten atzo.

Beraien kasua ez dute era isolatuan ulertzen zigorra jaso duten Itziar Claver eta Haizea Ramirez de Aldak. “Euskal Herria eta euskaldunak azpiratzeko asimilazio prozesuaren baitan” Madriletik zein Parisetik eratortzen diren legeek “euskaldunon hizkuntza eskubideen ukazioa eta zapalketa” dutela ondorio adierazi dute.

Ukazio eta zapalketa horien adibide “lazgarriak” jartzeari ekin diote ondoren: kale izendegia euskaraz jarri nahi duten herrien kasuan “laster etorriko dira goragoko administrazioen mehatxuak”, udalek euskara lehenesteko hizkuntza irizpideak martxan jarriaz gero “Estatuko abokatuak presaka hasiko du auzibidea”, Poliziaren aurrean “euskaraz jarduteko dugun eskubidea” aldarrikatu, eta, “kasernatik pasa ostean iritsiko zaigu isuna desodedientzia leporatuta”. Altsasuko EHEko kideek pairatu zuten azken kasu hau ere. 300 euro ordaindu behar izan zituten aipatu arrazoia dela medio. Eskubideen zapalketa horiek, baina, “ez dute inolako ondorio legal edo penalik”. EHEko kideen ondorioa argia da: “euskaldunok, enegarren mailako herritarrak gara geure herrian bertan”.

“Paisaia linguistiko arrotza” zapalkuntzaren beste adierazle bat gehiago gisa jo dute. Hori gainditzea xede jarri zuen abian “Ezabatu eta euskaraz bizi!” ekimena EHEk. Jardun hau gogor zigortu dute ordea.

Kikildu beharrean, “euskaraz bizitzen” jarraituko dutela baieztatu dute, “euskaltzale konprometitu eta aktibo gisara” erasoei erantzun eta Euskal Herri euskalduna eraikiz.

Epaiaren aurreko erantzuna ere bide horretara lerratu dute, “bakoitza bere etxean 48 orduz zigor injustu bat betetzen” egon beharrean “Euskal Herri euskalduna eraikitzen jarraitzeko” aste osoko egitarau zabala prestatuz: elkartasun mezuak zabaltzeko pankartak egiteko tailerra, pintxo-pote aldarrikatzaileak, teknologia berriak erabiltzen ikasteko tailerra, elkarretaratzeak, desobedientziari buruzko hitzaldia, kontzertua, bertso bazkaria, “Izan, egin eragin” dokumentalaren proiekzioa… Bertso bazkarian Xabier Silveira eta Eneko Lazkoz izango dira bertsolariak.

Manifestazioa ere egingo da larunbat arratsaldean, 18:30ean Gure Etxea eraikinetik abiatuta, “Euskaraz bizitzeari zigorrik ez! Ezabatu eta euskaraz bizi” lelopean. Bertan zein egitarauko beste ekimenetan parte hartzeko deia egin dute. Bide batez, lo zakua hartu eta itxialdia beraiekin igarotzeko gonbita luzatu dute.

Euskal Herrian Euskaraz (EHE), herri mugimenduko eragile euskaltzalea gara #MugarikGabekoEuskara

24 pentsamendu “Larunbateko manifestaziora joateko deia egin dute zigortuak izan diren Altsasuko EHEko bi kideek”-ri buruz

  • babestu dezagun euskara 2013-11-22 15:46

    Aurreko batean EHEk Zarautzen egin zuen ekintza txukun baten albisteko komentarioetan eztabaida petrala egon zen, argazkia ez omen zela oso ona eta itxura txarra ematen zela esanez edo. gogoan dut baten batek ehunka lagun bildu arren lau katu zeudela ematen zuela esaten zuela eta panorama tristea omen zela euskaldunentzat. Tristea zela, udal baten hizkuntza irizpideei babesa agertzeko hain jende gutxi biltzea, edo holako zerbait.

    Kritika hori egin edo onerizten zutenek aukera paregabea dute bihar Altsasuko manifara agertu eta irudi txarrik eman ez dadin euren harritxoa jartzeko. Hitzak haizeak daramatza, elkartasun ekintzak betirako geratzen dira.

    100 kilometro baino gehiago egingo ditugu bihar Altsasuraino ezagutzen ez ditugun horiengandik hurbil egoteko, eta beste ehun eta piko etxera bueltatzeko. Ez gaude prest euskararen aurkako erasoak beti onartzen ibili eta maila bajukoak balira bezala ulertzeko.

    UPNk euskara ezabatzen du egunero Nafarroatik, biomasaren feriarekin egin dutena kriminala da, eta ez da ezer pasatzen? D ereduko irakasleen kontra espioitza egiten dute, eta ez da ezer pasatzen?

    Hori bai dela panorama tristea. Ez EHErena, Euskal Herriarena baizik.

  • UPN, PSN eta PP euskara ezabatzeko gurutzadan dihardute Nafarroan, baina diskurtsoetatik at, ez dute erantzunik apenas alderdi abertzaleen aldetik.
    Altsasuko kultur programazioa, aisia- eta kirol-eskaintza gehien gehiena, udal liburutegia, merkatal gune txiki eta handietako paisaia, taberna ia guztietako musika, eta abar, erdaldunak dira. Ez UPNk hala izan dadin agindu duelako, udala (Bildu) arduratzen ez delako baizik.
    Nire ustez, Altsasun eta beste herri askotan, ezabatu ordez idatzi egin beharra dago. Euskaraz, noski.

  • Ez nago neska hauei jarri dieten zigorraren alde, hori argi gera dadila, baina benetan ez dut ulertzen zer izan dezakeen euskararen aldeko Altsasu aldeko seinale elebidunetan erdarazko testua ezabatzeak. Hori al da zonalde horretan euskarak duen behar nagusia?

  • Nafarrek bezala, EHEko bi kide horiei ezarritako zigorra onartezina da, baina EHEk ez du asmatzen ezabaketarekin. Sakanan seinalek eta kale izenak elebietan daude. Erdarazko testuak ezabatzean, erdaldunak erasotuak sentitzen dira, batetik, eta arazoak eragiten zaizkie autobidea zeharkatzen duten gidari atzerritarrei (espainiarrak barne), egonezina eta haserrea eraginez. Bertoko jende gehienentsuenak ere, ez du ekimen hori ulertzen.
    Aldiz, Sakanako herri gehienetako jarduera gehienak espainiera hutsez burutzen dira, eta udal gehienek ez dute ia ezer egiten euren eskumenekoak diren jardueretan eta eremuetan euskararen erabilera bizkortzeko. Adibidez, Iortia kultur guneak 10 urteak ospatzen ditu egunotan. 10 urte oso nagusiki kultura espainiarra sustatzen, eta euskal kulturari oso leku txikia eginez.
    1.000 seinale ezabatzea baino askoz eraginkorragoa litzateke Iortiako kultur programazioan euskarari leku duina ematea. Askoz ere.

  • Ados JJ eta Nafarrekin. Nire buruari behin eta berriz galdetu izan diot azken urteotan zer mesede egiten dion euskarari seinale erdaldunak ezabatzea. Uler nezake, garai batean, ekintza sinboliko gisa balio izana, baina gaur egun ez diot inongo zentzurik topatzen. EHEk autokritika sakona egin behar duela uste dut, Ekintza eraginkorragoak behar ditugu, edo betiko dinamika honetatik ez gara irtengo. Sakanako errealitatea ez dut ezagutzen, baina zentzuzkoa iruditzen zait JJk dioena. Agian exijitu behar zaio udalari jarrera aldatzeko, edo norabidea aldatzeko. Eta argi geratu dadila ez nagoela erabaki judizialarekin ezta isunarekin ados.

  • JJ, ados zure eskaerarekin. Udaletatik hasita euskararen aldeko apostu sendoagoa egin beharko litzateke, alor guztietan. Egia da ere euskaldunok apostu horri sostengua eman beharko geniokeela, bestela ez du zentzurik. Ez du zentzurik, adibidez, heldu eta gazteendako euskarazko antzezlan bat programatzea, antzezlan ezaguna eta aktore famatuekin gainera, eta hamabi pertsona joatea hura ikustera (140 kabitzen diren lekuan). Eta hori benetako kasu bat da, Altsasutik oso gertu dagoen herri batean. Hor Udalari helarazten zaion mezua da ez duela pena merezi euskarazko programaziorik egitea euskaldunen artean interesik pizten ez duelako.

  • Bai, hala da. Alde bietatik behar du. Baina abiatzen garen zulotik abiatzen gara, eta hori oso aintzat hartu beharra dago. Jendea erdaraz ohituta dago, erdaraz elikatzen da eguneko ordu guztietan, kultur erreferenteak erdaldunak dauzka… Egoera hori ezin da iraularazi dekretuz edo egun batetik bestera. Aldeko haizea egonkorra eragin beharra dago, planifikazio serioa eta egungo errealitatean oinarritua, eta urratsak ematen joan. Lehenik eta behin egungo egoeraren zergatiak azalduz jendeari, eta norbere herriaren hizkuntza berreskuratzearen onurak. Lan handia eta zaila da, hori ere jakin behar da, baina egun goazen bidetik, amildegira goaz zuzenean, gure diskurtso, pintura, pankarta eta ekintza sinboliko guztiekin batera..

  • Ados JJren azken iritziarekin. Uste dut antzeko zerbait gertatzen dela EITBrekin. Euskaldunok, peto-petoenak ere, ohitu gara telebista erderaz ikustera, arrazoi askorengatik. Egoera hau ez da egun batetik bestera irauliko, nahiz eta eitbk orain programazio berritua aurkeztu. Horretarako, ETBk alde batetik, programazio berritua, erakargarria eta merkatuaren beharrizanetara egokitua aurkeztu beharko du; bestetik, euskaldunok ere babestu beharko dugu apustu berri hori; bestela, jai! Hala ere, denpora behar da horretarako, eta porrota, seguru asko.

  • Jone Garaiok euskaldun akonplejatuei 2013-11-25 11:07

    Ez daukazue lotsarik. EHEri autokritika eskatzen diozue baina egiten al duzue zuek autokritikarik zuen jokabideaz? Gustatuko litzaidake jakitea zer egiten duzuen zuek, eta ea predikatzen duzuenarekin koherentea den praktika eramaten duzuen aurrera. EHEk ez ditu ezabaketak bakarrik egiten. Ezabaketak ere egitera deitzen ditu euskaltzaleak. Ezabaketek ze mesede egiten dioten euskarari? Ez dakit kuantitatiboki erantzuten horri, baina hemen horrne inguruko eztabaida ematen ari dela ikusita, lehen helburua beteta. Ezabaketarik eta horien aldeko iritzirik gabe, paisaje linguistiko glotozida besterik gabe irensten jarraituko genuke. Honek, Gordillok supermerkatuetatik jakinak ebasteak eragiten duen modura, errealitate horren gainean arreta jartzea dakar.

    Ai, euskaldun akonplejatu gaixoak gu… Errepidetik pasatzen diren atzerritarrekiko zernolako kezka… Eta, bitartean, euskaldunoi beti egurra eta euskaldunok beti amore ematen besteak ez haserrarazteko… Benetan ez zarete konturatzen? Ba ni bai, eta ez nago prest jarrera otzan horiek jarraitzeko eredutzat onartzeko, eta iruditzen zait erdaldunen (aski bermatuak dauden) hizkuntza eskubideen inguruko gure preokupazio honek euskaldunon menpekotasuna eta mentalitate azpiratua noraino iristen den erakusten duela. Lotsagarria gure azpiratze sikologikoa, hain barruraino sartuta daukagun espainolito eta frantsesitoa.

    EHEkoa izan nintzen garaian ezabaketen inguruko eztabaida ugari izan genituen. EHEri eskatzen zenioten autokritika hori EHEn iraunkorra dela esan dezaket. Pixa egiten digute burutik behera erdaldunek, baskoek zein espainol eta frantsesek, eta gu hemen, umekeritan, barruraino sartu diguten kulpabilitate horrekin auto-inmolatzen. Euskal Herrian euskara espainol eta frantsesei inposatzen diegu baita ere, ezta? euskara eta euskaldunok gara inposatzaileak, ezta? D ereduko irakasleei espioitza, Biomasako feriako karteletan euskara ezabatzea, goiko komentarioan beste batek komentatu duen kasua, TIL eta halako eredu euskariziden inposatzeak, erabateko glotozidio estrategia bizi dugu, Euskal Herria desagerrarazi nahi duena, baina EHE da autokritika egin behar duena. Zuek ez, anonimotasunean eta norbere egitekoei erreparatu gabe beti besteei gauzak eskatzen. Azaldu mesedez zeintzuk diren zuen ereduak, ea horiekin euskara salbatzen dugun, eta ea EHEk ere eredu milagroso horietatik ikasi eta bere jarduera ankerra baztertzen duen. Bakea eta maitasuna, segi buru makur eta akonplejatu.

    Azken gauza. Hain zaudete itsu, hain dituzue ezarri dizkizueten eskemak barneratuta, ezen ez zaretela konturatu EHEko kide horiek ez zutela ezabaketarik egin (borondate hori bazuten ere), ezabaketak egitea leporatuta zigortu nahi izan zituztela eurak eta ekimena bera, epaiketa fartsa bat egin zietela eta ezer frogatu gabe kondenartu zituztela.

    Segi buru makur, autopistako gidari atzerritarren hizkuntza eskubideen defentsan.

  • Lasaitu hadi Jone, eta zaindu hiztegia. Beharbada aipatu dituzun abildade horiek zeure-zeureak dira.

  • Eskerrak zu bezalako iluminatuak dauden Euskal Herrian akonplejatuoi begiak irekitzeko, bidea erakusteko, zein erratuta gauden gogorarazteko. Eskerrik asko gure mesias! Zein da gure penitentzia?

  • Joneren (edo Jonen, ez zait oso garbi geratu) hitzekin bat nator oro har. Tonu gogorra du baina ez dut uste deskalifikazio pertsonalik dagoenik, jarrera konkretu bat kritikatzen baitu. Argudio sorta txukuna dela deritzot. Pena eman dit JJ eta Nafar erabiltzaileek erantzun dutenean kontrako argudiorik irakurri ez izanak. Eztabaida aberastu baino, hankamotz utzi dutela uste dut, eta bide batez arrazoia eman diotela Joni edo Joneri isiltasunaren bidez.

    Ados nago bi erabiltzaile hauek hasierako erantzunetan esaten dutenaz, EHEri egiten dieten kritika, nire ustez hutsala, kenduta.

    Dena den, batez ere Nafar delakoaren azkenaz esan behar dut, bakoitzak bere errezetak botatzen dituela, eta berak bereak bota dituenean ez badugu iluminatutzat hartu eta bere iritzia kontuan hartu badugu, berak ere aukera polita zuela antzeko zerbait egiteko. Eta EHEko norbaitek zuri berdin erantzungo balizu horrelako zerbaitekin?: “Eskerrak zu bezalako iluminatuak dauden Euskal Herrian Euskarazeko inkonpetenteoi begiak irekitzeko, bidea erakusteko, zein erratuta gauden gogorarazteko. Eskerrik asko gure mesias! Zein da gure penitentzia?”.

    EHEk, nik dakidala, ezabaketak baino askoz gauza gehiago egiten ditu bere egunerokoan, eta Kontseiluaren, UEMAren eta beste hainbat konturen sorreraren atzean egon da. Zuen errelatoan absurdora eraman duzue EHEren egitekoa (ez dakit ezezagutzatik edo fede txarretik zein onetik egina dagoen) eta zentzu horretan ulergarria deritzot edozeinek suminduratik erantzuteari.

    Hori bai, EHEko norbaitek hari honetan bere ekarpena jasoko balu ere, askoz hobeto

  • “Ez daukazue lotsarik”, horra Joneren lehen “argudio txukuna”; eta doinu horretan joan da beste guztia ere.
    Nik ez daukat deskalifikazioa erabiltzen dutenekin ezer eztabaidatzeko ohiturarik.
    Bestalde, bai zeuk, Erromes, bai berak ere, EHEren jarduera eta erakundea bera egiten dituzue gure kritiken helburu. Bada ez. Nik neuk behinik behin, jarduera zehatz eta jakin bat kritikatu dut: ezabaketa.
    Hortik aurrera, EHE existituko ez balitz, asmatu beharko litzatekeela uste dut. Eta espero dut Jone baino irekiagoak izatea EHEko kide gehienak. Ez niregatik, erakundearengatik beragatik baizik.

  • Kaixo lagunak,
    Ba ni ere erabat ados Jonerenarekin. “Ez duzue lotsarik” esan du. Hori deskalifikaziotzat jotzea ez ote da gehitxo… Ezabaketak soilik kritikatu direla esatea ez ote da gutxitxo… Aitzakia eskasaren itxura handiagoa du, errespetuz diot. Joneren hitzak neure egiten baditut eztabaidatuko zenuke nirekin? Ez naiz EHEkoa, ez naiz EHEkoa inoiz izan, baina ezagutzen dut euren jarduna, baita mezua ere, eta erabat identifikatuta sentitzen naiz eurekiko, argi gera dadila. Ezabaketetaz zera uste dut: euskaldunok egunero bizi behar dugun egoera mingarrira apur bat hurbiltzeko balio duen ekintza sinbolikoa da, guztiz baketsua, eta euren erdal mundu erosoan gure minari arretarik jartzen ez dion erdaldunari eragiten zaion molestia txiki bat (asko jota). Nik gay mugimenduan militatu dut, eta feminismoa ere jorratu dut. Oroitzen naiz mikromatxismoak zer ziren ikasi nuenean mundu berri bat deskubritu nuela. Eg7nerokoan ia oharkabe egiten ditugun jazarpen txikiak nonahi daude, gure baitan ere, baina ez ditugu jarrera matxistatzat hartzen, onartuta ditugu. Euskararen inguruko zapalketarekin antzekoa gertatzen da. Hain da ohikoa eguneroko zapalketa txiki multzoa, handiei soilik erantzuten diegula txikiak berez onartuz, zapalketa gradua aitortu gabe, eta zapalketa horiek praktikatzen dizkigunari aurre egiteko kapaz ere ez gara, bera ez molestatzearren, gure mina txikikeria delako guk geuk sisenten dugun unetik

  • Hara zer uste dudan: JJ eta Nafarrek elkarrizketa monologiko hori luzatu duzuela inork ez zizuelako jaramonik egiten, eta zuen probokazioa luzatu duzue baten bat erori arte. Ea zorionak, lortu duzue!
    Eta zergatik ez zizuen inork jaramonik egiten? Hara zer uste dudan: benetan tristea delako zigor injusto baten albistea baliatzea ehe-ko militanteak erasotzeko, duela bi urte egin zuten zerbaitengatik.
    Oso tristea.
    Zuek esana, labur: zigorraren kontra gauden arren, ezabaketak kaltegarriak dira.
    Esan zenezaketen gauza berbera, baina kontrakoa azpimarratuz: ezabaketekin ados egon ez arren, zigorrak gehiegizkoak dira.
    Notizia, oraingoan, zigorraren bidegabekeria zen.
    Eta bat egiten dut Joneren haserrearekin.

  • Ez dut eztabaida hau gehiago luzatu nahi baina benetan harrigarria egiten zait irakurtzea nire mezuak “probokazioa” direla. Nik berria irakurri nuen eta neure iritzia eman nuen eta ondoren eztabaidatxo bat sortu zen JJ eta Neurekin, besterik ez. Horrek norbaiten haserreak piztu baditu ba zer egingo diogu. Zorionez herri honetan iritzi ezberdinak ditugu, Jone etabarren baimenarekin.

  • Egia esan Joneren eta ondokoen erantzunak ikusita, erabat harrituta geratu naiz. Nik uste dut foro honetan parte hartu dugunok hasieratik adierazi dugula epaiaren aurka gaudela. Ez dut uste hemen inork EHEko kideak erasotu dituenik. Hemn kritikatu dena EHEren ohiko jokabide bat da, ezabaketarena. Eta horren inguruko iritzia eman genuen, besterik ez. Eta nik berriro diot ezabaketa kanpainaa guztiz alperrikoa iruditzen zaidala, euskararen aldeko jarrera sortzea baino, hain zuzen ere kontrakoa lortzen baitu, nire ustez behintzat. Badirudi, Jonen eta besteen iruzkinak irakurrita, jende bat ez dagoela prest berea ez bezalako iritziak entzuteko, ezta ezabaketa dinamikaren porrota onartzeko. Ondo izan.

  • Jone Garaio 2013-11-26 12:05

    Hitzez hitz berresten dut atzo esandakoa, eta erantzun berrieri erantzun nahi diot. Nik ez dut problemarik besteen iritziekin. Irusitzen zait “JJ”, “Nafar” eta “Neu”ren kritika ia arrazoitu gabea eta itsusia dela, eta haserretik egin diet neure kritika iritzi hoiei. Ez duzuela modua gustoko? Neuk ere ez zuena. Itxia naizela uste duzue. Lotsarik ez duzuela uste dut, euskaldunaren konpleju historikotik hitzegiten duzuela brotxa lodia erabailiz eta gauza asko ahaztuz (nahita edo nahi gabe…), horra nire itxikeria. “Penagarri”k asmatu duela ere uste dut: “Zuek esana, labur: zigorraren kontra gauden arren, ezabaketak kaltegarriak dira. Esan zenezaketen gauza berbera, baina kontrakoa azpimarratuz: ezabaketekin ados egon ez arren, zigorrak gehiegizkoak dira”. Zure baimena behar dut horretarako, “Nafar”? Nik ez diot nirea behar duzunik, baina onartuko didazu zure eskubide berdina dudala zuk esandakoari erantzuteko, ez? Ni iluminatua naiz baina zure sententziak zentzu komunaren adierazle? Mesedez… “Neu”: zeinek esan du ez dagoela prest zure iritzia entzuteko? Entzun dut, eta neure iritziarekin erantzun dut. Zeinek du problema besteen iritziekin? Oraindik argudiorik eman gabe jarraitzen duzue. “Jende bat” ez dagoela prest “ezabaketa dinamikaren porrota onartzeko” diozu. Nondik ateratzen duzu ezabaketa dinamikaren porrota? Zertan oinarritzen duzu iritzi hori sententzia eztabaidaezin bihurtzeko? Onura baino kalte gehiago eragiten du? Nola neurtu duzu hori? Zure pertzepzioaz ari zara? Espekulatzen agian? Nik badut dinamika horren porrota edo arrakasta neurtzeko elementu bat, nire pertzepzioei gehitzen diedana: EHEko talderik ez dagoen herri eta leku pila batean egiten ditu ezabaketak jendeak (“jende bat” hori izango dira hoiek ere), hori bistakoa da, ezjakintasunetik edo fede txarretik hitz egin duzuela bistakoa den modura. Gainera EHEk ez du inoiz arazorik izan gaizki egindakoak onartzeko, egin dituenean. Eragile oso irekia da, nire garaian holakoa zen gutxienez. Zenbat aurreiritzi…

  • Nestor Esteban 2013-11-26 13:21

    Kaixo EHEko kidea naiz.
    Ematen ari den eztabaidaren harira, zera esan nahi dut: EHEko kideok eta EHEko kideak ez diren askok, urteak daramatzagula ezabaketak egiten, seinaleak euskalduntzen, hizkuntza ordezkapenari aurre egiten, herri hau menderatzeko aplikatzen diguten hizkuntza gatazka eta asimilazio prozesua oraindik indarrean daudela erakusten… Helburu nagusia, bizi dugun hizkuntza zapalkuntza agerian utzi eta paisaia linguistikoan aldaketak eragitea dela. Helburua betetzen ari dela uste dugu eta hainbat herritan aldaketa horiek sumatu direla ere esan dezakegu. Hor kokatu beharko genuke Altsasuko EHE bi kideek, beste askorekin batera, jaso duten zigorra, bide hori eteteko nahian. Ez gara hizkuntza komunitate bakarra, ez gara bakarrak, Asturies-en, Paisös Catalans-etan eta abarretan ere egiten dira ezabaketak. Oker, zuzen egon gaitezke, baina guk bide eraginkorra dela uste dugu inork kontrakorik erakusten ez digun bitartean. Hala ere, EHEren lana ezingo genuke horretara soilik mugatu, EHEtik euskaraz bizitzearen aldeko hautua indartzeko gauza anitz egiten baititugu. Dinamika ezberdinak dira martxan Euskal Herriko hainbat eta hainbat herritan, izan norbanakoei zuzendutakoak, herri gogoa indartzeari begirakoak, espazio euskaldunak indartu edota berriak sortzea bilatzen dutenak… ekimen asko eta askotarikoak, publikoak zein horren publikoak ez direnak, gure kasa batzuk, eta beste batzuk beste eragile batzuekin auzolanean.

    Bide batez, eraikitzailea den bitartean ekarpen oro beso zabalik onartzen dugula argitu nahi dugu, eta aukera hau baliatu nahi dugu zuen kezka eta iritziak zuzenean EHEri helaraztera gonbidatzeko. EUSKALTZALE@EUSKALHERRIANEUSKARAZ.ORG helbidean duzue horretarako txokoa.
    Eskerrik asko.

  • Jone:

    Erantzuten saiatuko naiz, puntuz puntu. Ia ezer ahazten ez badut:

    Zure erantzuteko modua: asteburuan JJk, Nafarrek eta hirurok izan genuen ‘eztabaida’ txiki horren ondoren nola erantzun zenuen eta zure ondotik eztabaida nola joan dan ikusita guztiz harrituta geratu nintzela esan nuen atzo gabaz. Egia esan, nahiko modu ‘agresiboan’ erantzun zenuela iruditu zitzaidan, asteburuko eztabaida, nire ustez, nahiko ‘epela’ izan zen eta. Nik uste dut inork ez duela arazorik inorekin eztabaidatzeko, webgune honetan, planteatzen diren gaien inguruan. Baina uste dut ez zenuela hizkuntzaren erabilera ondo neurtu. Ikus, adibidez, zelan hasten den zure erantzuna: “Ez daukazue lotsarik.”
    Bigarrenez, lartxu iruditzen zait “euskaldunaren konpleju historikotik hitz egiten dudala/dugula” esatea. Hasteko eta bat, ezagutzen ez nauzulako eta nor naizen ez dakizulako. Eta ez dakizu zer-nolako harremana izan dudan eta dudan euskerarekin. Eta ziurtatzen dizut nik ez dudala inongo konplejorik euskalduna izateaz. Niretzat euskara hautu pertsonala baino askoz gehiago da, eta inguruan nagusi den korrontearen aurka egin behar izan dut beti hautu eta nahi horri eusteko. Errealitate aski konplexuan bizi naiz, eta ziurtatzen dizut konplejua, precisamente, konplejua, ez daukadala batere. Beraz, eskertuko nizuke nire esanak diozun “konpleju historikotik” ez epaitzea. Ez zait zilegi iruditzen eta.
    Zigorrari buruz diozuna, ados; gure eztabaida ez da zigorrean zentratu, ezabaketaren ekintzan baino. Beste modu batera adierazi ahal genuela gure haserrea, ados. Baina eztabaida beste angulu batetik enfokatu dugu. Eta uste dut hirurok (nik behintzat bai) adierazi dugula epaiarekin ados ez gaudela. Nik behintzat horrekin dana esana dut. Larregizkoa? Bai, noski. Horrek esan nahi du ezin dugula ekintzari buruz eztabaidatu?
    Ezabaketaren porrotari buruz diodana, ulertuko duzun moduan, nire iritzia baino ez da. Logikoki, nire ikuspuntutik, ekintza horrek ez dio inolako mesederik egiten euskarari. Pertzipzio kontua izango da, jakina, ez baitago horren inguruko ikerketarik edo datu objektiborik (badago, balego, mesedez, esaidazu; irakurri eta ondorioak ateratzeko). Baina, aizu, ikusten dudanez, zuretzat ekintza zilegia eta arrakastatsua da. Ondo iruditzen zait, zure iritzia baita. Eztabaida honen azken eratzunean, Nestor Esteban EHEko kideak bere iritzia ematen du, eta ezabaketa EHEko kideei eraginkorra iruditzen zaiela dio. Ondo deritzot. Ekintza berari buruzko ikuspuntu desberdinak dira. Ziur aski, bat bera ere ez da izango egi osoa. Nik neuk ere nire lehen erantzunean aipatu nuen ekintza sinboliko gisa beste garai batzuetan zentzuzkoa iruditzen zitzaidala. Gaur gaurkoz, Sakanan, ez.
    Ezjakintasunetik edo fede txarretik nabilela / gabiltzala diozu. Ezjakintasunari buruz: nik ez dut sekula EHEn militatu, eta ez dut egingo, gustatzen ez zaizkidan gauza batzuk aldatzen ez badira, behinik behin. Baina horrek ez nau ignorante egiten. Izan ere, oso hurbiletik jarraitu dut EHE, lagunak ditut bertan ibilitakoak, eta ekintzen berri izan dut ‘Euskaltzale’ aldizkariaren bitartez. Eta EHEk antolatutako beste ekintza batzuetan ere parte hartu izan dut (‘Euskaraz bizi’ eguna, adibidez). EHEk egiten dituen ekintza asko oso onuragarriak iruditzen zaizkit; beste gauza askorekin, ordea, ez nago ados. Gustatzen ez zaidana adierazteak esan nahi du fede txarrez nabilela? Aizu, hau ere lartxu esatea ez zaizu iruditzen?
    EHE mugimendu irekia dela diozunean, beharbada zure pertzepziotik zabiltza, ez duzu uste? Honek beste eztabaida baterako beste ematen du, eta ez dut eztabaida horretan sartu nahi, baina nik neuk zure iritzia ez dut partekatzen. Baina ez dizut horregatik erasotuko.

    Besterik gabe, amaitzeko, uste dut euskararen eta gu guztion mesederako, horrelako eztabaidak beste patxada batez hartu behar direla, nik neuk behintzat iruzkinak irakurtzean tentsioa sentitu dut eta. Eztabaidatzea librea eta zoragarria da, ni beti nago prest, baina mesedez, errespetuz egin dezagun.

    Ondo izan

  • Neurekin bat nator, zer egingo zaio…
    Eta eskertzen da Nestorren erantzunaren doinua; horrek bide ematen baitu eztabaidarako eta elkarrizketarako. Hala ere, nik dakidala, ez Nafarrek, ez Neuk ez neronek ere, ez dugu EHE bera kritikatu, EHEren jardun jakin bat baizik. Hau da neronek egindakoa, hitzez hitz: “Nafarrek bezala, EHEko bi kide horiei ezarritako zigorra onartezina da, baina EHEk ez du asmatzen ezabaketarekin. Sakanan seinalek eta kale izenak elebietan daude. Erdarazko testuak ezabatzean, erdaldunak erasotuak sentitzen dira, batetik, eta arazoak eragiten zaizkie autobidea zeharkatzen duten gidari atzerritarrei (espainiarrak barne), egonezina eta haserrea eraginez. Bertoko jende gehienentsuenak ere, ez du ekimen hori ulertzen.”
    Hortxe bukatu zen kritika, asmorik eraikitzaileenarekin egina portzierto. Izan ere, nik ere sinpatiaz ikusi dut beti EHE, eta elkartasunez, beren jarduera guzti-guztiekin bat etorri ez arren, eta bakarren bat kalterako ere badela iritzi arren.
    Hala ere, eta sortu den nahaspila ikusi eta gero, hurrengoan Nestorrek emandako helbidera bidaliko ditut bidali beharrekoak, ez zalantzarik izan.

  • Nire elkartasun osoa EHEren kideentzat. Eutsi gogor EHE !!
    .
    Zuen borroka eredugarria da.