Koldo Gutierrez Boada: “Nazionalismoak ez dizu jatekorik emango, ezin da beste oinarrizko gauza batzuen aurretik jarri”

Koldo Gutierrez Boada: “Nazionalismoak ez dizu jatekorik emango, ezin da beste oinarrizko gauza batzuen aurretik jarri”

Koldo Gutierrez Boada: "Nazionalismoak ez dizu jatekorik emango, ezin da beste oinarrizko gauza batzuen aurretik jarri"

Koldo Gutierrez Boada (Beasain, 1987) Gipuzkoako Gazte Sozialisten koordinatzaile ohia.

Nolatan sartu zinen politikan?

Familian tradizio politiko nahiko handia izan dugu betidanik, herri mailan batez ere. Nire birraitona PSOEren lehen ehun afiliatuetako bat izan zen! Eta etxean, txikitatik balio sozialen inguruan hezi naute: jendearekiko errespetua, hezibide ona… Beraz, niretzat, azken batean, gauza natural bat izan da politikara salto egitea, balio horiek defendatzeko. Gainera, ezkontza homesuxalen gaiak azken bultzada eman zidan, nuen denbora eskasa nire balioak defendatzera eskaintzeko.

Nola iritsi zinen Gazte Sozialisten koordinatzaile izatera?

Pertsona berria nintzen, eskarmenturik gabea eta lurraldean zeuden herri-elkarteek ados jartzeko zuten arazoaren aurrean (funtzionatzeko era eta antolamendu gaietan), elementu neutral eta berri aproposa nintzen.

Zertan zetzan zure lana?

Gazte Sozialistoi arduratzen gaituzten gaien inguruan ekitaldiak antolatzen ditugu, beste lurraldetako gazteekin batera, interesatzen zaizkigun gai horretan adituak diren pertsonak ekartzen ditugu hitzaldiak ematera, alderdikoak batik bat; adibidez, legea osatu duten pertsonetako bat, zertan datzan azal diezagun, zertan den ona eta zertan den txarra azal tzeko eta abar. Eztabaidak sortzen ditugu eta gero, topaketa horietatik sortzen diren ideiak edo ateratako ondorioak alderdira eramaten saiatzen gara, Alderdi Sozialistako hauteskunde programa behetik gora osatzen baita. Eta nire lana, aipatutako guztia koordinatzean datza, edo zetzan.

Zergatik utzi duzu politikako lehen lerroa?

Militante izaten jarraitzen dut afiliatuta nago, baina lehen lerrotik erretiratzea erabaki dut ez bainator bat Gazte Sozialisten momentuko ildo ofizialarekin. Nik proposatzen nuen ildoa “kalekoa” zen, kanpokoko ekintzetan oinarritua; baina alderdiari momentu honetan ez zaio hori interesatzen, barneko ildo bat jarraitu nahi dute; beraz, ez dut beren lana oztopatu nahi eta nahiago dut kanpoko ildo hori nire kabuz jarraitu momentu oro kritikak egiten aritu ordez. Orain manifestazioetan eta mugimendu sozialetan nago, politika egiten jarraitzen dut, gure eskubideen alde borrokan; alderditik kanpo, kalean, baina alderdiari kalterik egin gabe.

Non ikusten duzu zeure burua etorkizunean?

Ez dut neure burua kargu politiko batean ikusten. Heterodoxoegia naiz, alderdi-diziplina ez doa nirekin. Politikan ordez, nire ideia sozialak enpresa pribatuaren esparruan garatzea gustatuko litzaidake, zentzu praktikoago batean; adibidez, , langileen eta ingurugiroaren eskubideak defendatzen dituzten baloreak defendatuz. Azken batean, tamalez, enpresak dira sistemaren motore nagusia eta agintea dutenak.

Nolakoa da zure ustez daukagun klase politikoa?

Nik uste dut daukagun klase politikoa gizartearen isla hutsa besterik ez dela. Politikariak ez dira kanpotik etorritako estralurtar arrotzak. Jendea politikariez kexatzen da; baina, zer egiten dute? Lau urtean behin bozkatu, besterik ez. Eta hori ez da demokrazia. Jardun demokratikoa ez da lau urtean behin bakarrik egin behar, uneoro baizik. Manifestazioetara edo protesta ekintzetara noanean, ez dago inor. Etxean eta lagunartean kexu eginda soilik ez da ezer lortzen, guztion interesak kaleak defendatu behar dira.

Zure ustez, nolakoa izan da Patxi Lópezen lana?

Nik uste dut ondo ari dela, gertatzen dena da gauzak ez direla batere ondo komunikatzen ari, komunikazio sailetik, diot. Gauza interesgarriak egiten ari dira: terrorismoaren gaia, esfortzu handia inbertitu da horretan; hezkuntza eta osasuna modu aktiboan ari dira defendatzen, beste erkidego batzuetan egiten ari direnarekin alderatuz, zerbitzu sozialak zabaldu egin dira, lan eskaintza publikoak sortu dira… Eta nik uste dut ondo egindako horiek ez direla modu egokian komunikatzen ari eta, horregatik, nik uste, jendeak ez du horren berri.

Eta orain arteko agintaldi jeltzalea luzearekin alderatuta, zer lortu da?

Tira, nazionalismoak ez dizu jatekorik emango. Ekintzetan, euskaran, independentzian eta antzekoetan uneoro pentsatzeak ez dizu etorkizuna konponduko, horiek ezin dira beste oinarrizko gauza batzuen aurretik jarri. Euskara, adibidez, ez da arma bat, tresna bat baizik, guztion tresna bat. Eta nire ustez, alderdi nazionalistatik guztion tresna hori arma gisa erabili du guztien kontra. Aldiz, lana izatea, bizi kalitatea hobetzen lagunduko diguten zerbitzu publiko on batzuk izatea, kaletik seguru ibiltzea… hori bai, horrek behar du lehentasuna. Hori lortu dela pentsatzen dut eta, nire ustez, orain hobeto bizi gara.

Koldo Gutierrez Boada: “Nazionalismoak ez dizu jatekorik emango, ezin da beste oinarrizko gauza batzuen aurretik jarri”
Gazte Sozialistak, Patxi López, politika, PSOE, sozialismoa

UDAZKEN KOLOREAK

13 pentsamendu “Koldo Gutierrez Boada: “Nazionalismoak ez dizu jatekorik emango, ezin da beste oinarrizko gauza batzuen aurretik jarri””-ri buruz

  • Euskaraguztiona da kar-kar-kar 2012-08-16 10:40

    Koldo, lagun, lerrook irakurtzeko moduan bazaude erantzuidazu, mesedez:
    Zergatik uste duzu nazionalistek euskaran, independentzian eta antzekoetan besterik ez dutela pentsatzen? Nazionalista espainiarrek, PSOEkoek adibidez, ez dut uste horreta pentsatzen aritzen direnik, eta Nazionalista basko gehienek “beste oinarrizko gauzetan” ere pentsatzen dutela iruditzen zait.

    Aizu, Koldo, beste galdera bat: nola edo zertan erabili dute nazionalistek (baskoek, i supose) euskara beste guztien aurka?
    Eta euskara guztion tresna bada, zergatik ez duzue sozialistek apenas erabiltzen? Zergatik lotzen duzue indarkeriarekin edo, zeuk egin bezala nazionalismoarekin, “guztion tresna” baldin bada?
    Nola liteke Lehendakariak euskaraz zipitzik ere ez jakitea, 20 milioi xahutu eta gero?
    Portugaleten ikastola, D eredua eta euskaltegiak aspaldikoak dira, baina ez ziren nonbait, Lópezen gustukoak…
    Bide batez, esango dizut euskararekiko amorrua besterik erakusten ez duen sozialista dezente ezagutu dudala. Jakinaren gainean egon zaitezen.
    Ongi izan.

  • Auzo-lotsa handi xamar sentitu dut Lopezen bilana zein omen den irakurrita: “lana sustatu du”???!!!! “Hobetu egin du, osasunean eta hezkuntzan” ????!!!! eta merketeetan merkeena: “orain hobeto bizi gara” ???!!! Eta euskararen gainekoaz, zer esan??. Hitz hutsalak, “denon tresna da”, horregatik, GUK, naziolatista espainol ezkerreko autodenominatuok IA INOIZ EZ DUGU ERABILTZEN, FOLKLORIZAZIORAKO EZ BADA!!

  • Nazionalista bera da, española. Honekin ez dago zer hitz eginik.

  • Ni benetan harritu nauena izan da Koldoren janzkera-bizarkera erabat “jarrai-haika-segi” tankerako horrek. Ikaragarri harritu nau… baina ez naiz ondoriorik ateratzera ausartzen. Inork lagunduko balit…

  • Español honek, hobe luke bere alderdiko lagunei esatea, euskaldunoi izorratzea “ezin dela beste oinarrizko gauza batzuen aurretik jarri”.

  • Iker Tubia

    “Euskara, adibidez, ez da arma bat, tresna bat baizik, guztion tresna bat. Eta nire ustez, alderdi nazionalistatik guztion tresna hori arma gisa erabili du guztien kontra”.
    PPSOE diskurtsoa. Esaten dute bai, arma gisa erabili dugula euskara, baina azaldu gabe zein momentutan eta nola. Zer da euskara arma gisa erabiltzea? Zer da euskara gainontzekoen aurka erabiltzea? Guziona bada, nolatan lortu dugu batzuek gure egitea besteen aurka erabiltzeko? Ez dut ulertzen. Inoiz ez dute azaltzen “euskara ez da arma bat” hori; ez dute esaten ez dakitelakoz. Ez baita arma bat, gure hizkuntza baizik. Baina ez haiena, zoritxarrez.

  • Ja ja ja ja ja ja ja ja ja ja ja ja ja ja ja ja.
    Bai jaten ematen duna PSOEren sozialismoa da, tuntunak garela uste du? Ziur ez dakiela ezta zer den ezkerrekoa izatea.
    Gutaz parre egiten ala? Lerro gutxi tontakeri eta demogogia asko.

    Txo ba al dakik gauza ez dela Nazionalismoarekin jaten den ala ez (eta jaten eman like) gauza da Nazio izan gabe ezingo degula jaten ematen digun eredu soziala jarri,ez sozialismoa ez ezer (ala ere gazte sozialistakoa bada ezin du sozialista izan bere taldean sozialismorik ez dagolako) gu nahi degun eredu soziala Espainiaren eredu sozialaren kontrakoa dalako, gure ohitura eta hizkuntzak ez dulako Espainiarekin zerikusirik…..

    Gauz bat argi gelditu behar da, gauza ez da Nazionalismoa jaten ematen dun ala ez, gauza da onerako edo txarrerako gu gure herria kudeatzea, guk erabakitzea ze motatako eredua nahi degun eta ez Espainiako beste autonomia erkidegoko politikariek gure Nazioan zer egon behar den erratea.

    Miserian bukatzen badegu izan dezala gu gaizki egin degulako eta ez beste batzuk miserira bidali gaituztelako. Nola nabaritzen zaion Nazionalismo Espainiatarra.
    Ume moko batekin ezingo lukete hauek eztabaida izan, gaizki geldituko zirelako.

  • Galdera bat daukat aspaldi erantzun bakoa: zergatik ez du erabiltzen prentsa batek sarriago ESPAINIAR NAZIONALISTA definizioa, horrek lagun asko bere lekuan jarriko lituzke; kontua ez da esatea “zu nazionalistago”, baizik eta bistaratzea zer dagoen horren atzean, jende askok ez du ikusten eta esango dizu Euskadin gehien saltzen den prentsa NEUTROA DELA!!! Horretan, onartu behar dugu, artistak dira. Nire ustez, berandu, baina bada garaia gauzak diren bezala izendatzeko.

  • Ematen du lokaleko paretetako esaldiak buruz ikasi eta erantzuten ari dela. Eskubideak, kale-mugimenduak eta manifestazioak. Ni ere izaten naiz manifestazioetan, eskubide ezberdinen alde edo astakeria ezbedinen salaketan, eta jende ASKO ikusten dut. Agian pankartak izango dira ezberdinak. Bere inguruko jendea mugitzen ez bada lehen erreflexioa hor egin behar luke, ea non dabilen.

    Osabaren bidetik abiatuko zen umetxoa, hura ere zinegotzi izan da (eta da) udalean eta gaur egun Madrilen dago (zinegotzi kargua utzi gabe, noski). Bdakizue, konpatibleak diren bi kargu horiek.

    Demagogiaz betetako diskurtso pobre horren atzean ordea, oso sakon errotutako ideologia espainola besterik ez dago. Hizkuntzarena mingarria baino aspergarria egiten zait jadanik. Euskara usaindu ere egiten ez duen edo eguneroko bizitzan ukatzera iristen den jendeak euskararekiko bere ardura eta konpromiso falta argudiatzeko erabiltzen du “guztiona” dela eta “arma bezala erabiltze” hori (alegia, hizkuntza aukeratzeko eskubidea, nahiz eta beraientzat zein aukeratu duten argi utzi).

    Porzierto, ze hizkuntza erabili aukeratzeko ezagutu egin behar dira aurrena, eta euskaraz ez dakienak ez digu aukeratzen uzten. Hori bai dela arma bezala erabiltzea.

    Enpresa munduan egin nahi omen du bere lan politikoa… UGTn, pentsatzen dut. Hor aterako du hurrena lepoa agian.

  • Eta aurpegi gogorra izan behar da Sozialista deitzeko, ez bait dakite ezta zer den, eta PSOEk “demokrazian” gaudenetik 22 urtez izan du Espainia estatuaren boterea, bitan ia kiebran utzi zun, ze motatako sozialismoa da hori? Aberatsak gero eta aberatsago eta bitartean herriak eta estatuak erruinan. Lotsatu beharko zan erraten ditun gauzekin.
    22 urte hoeitan ez dute ezkertiar den neurri bakar bat egin, ezta bat ere.
    22 urtetan boterea izanda ez dira gai izan errepidetan lurperatuta dauden beraien kide edo jarraitzaile ateratzea.
    Nola fidatuko zera bere jendea traitu dutenetaz? Nola fidatu PSOEn Frankista ugari daudenean? Ba al daki berak PSOEko buruzagi gehienak (Zapatero barne) guraso Frankista, falangistak… zirela? Zapatero bere aitonaz hitzegiten dunean ahasten zaio esatea ez zala hil Frankoren aurka zegolako (alde bait zegoen).
    Doaztela guztiak popatik hartzera.
    Eta espero det ez EHbildu ez EAJk PPSOEkin inolako paturik egitea beraiekin gobernuan sartzeko, orain eginen badute nire bozkarekin ez dezatela berriro zenbatu.
    EAJk bakarrik,EHBildu bakarrik edo biak, baina ez PPSOErekin.

  • Amonamantangorri 2012-08-20 17:58

    Nazionalismoak bakarrik igual ez du jaten ematen, baina gogoratu beharko da PSOEk eta PPk, beren burua hurrenez hurren estatu sozialaren eta patriotismo konstituzionalaren defendatzailetzat duten horiexek, eskutik elkar hartuta Espainiako Erresumaren subiranotasuna hutsaren pare utzi dutela, finantza erakundeetatik datozkien agindu guztiei itsu-itsuan men eginez.

    Hau da, ez dute ezer egin Espainiaren delako INTERES NAZIONAL OROKORREN alde. Ez dute ezer egin -borondatez nahiz bortxaz- espainiar herritar direnen interesen defentsan.

    Herriaren beharrizanekiko axolagabekeria berbera ikusi zen, adibidez, 80 eta 90eko urteetan Latinoamerikan soportatu ziren gobernu neoliberaletan.

    Espainia aldean Julio Angitak esana da, eta ez arrazoi gutxirekin, Espainia aldean gizabide minimo bat egonen balitz orain arte agintean egon diren hainbat jendilajek preso egon behar luketela, NAZIOARI TRAIZIO EGITEAGATIK.

    Pelotazoaren kultura, kirol-txobinismoa, analfabetismo politikoa, sozialki onartutako ustelkeria, amnesia kolektiboa dira, besteren artean, egungo espainiar nazionalismoaren eta erregimen politikoaren oinarriak.

    Nire ustez behintzat, Euskal Herrian badira nahiko kondizio bestelako proiektu nazional bat gorpuzteko, demokratikoagoa eta herri gisa ditugun beharrei hobeki erantzun ahalko diona.

  • “Azken batean, tamalez, enpresak dira sistemaren motore nagusia eta agintea dutenak”. Hi, atzo goizean jaiotakoak garelakoan? Hire alderdiak aspaldian hartu zian erabakia ekonomia pribatua publikoaren gainetik jartzeko, eta klaseen arteko aldeak handitzen lagunduko duten neurriak sustatu edo babesteko. Aitortu ezak hori. Bestalde, protestara inor ateratzen ez dela diok. Ateratzen duk bai, jende asko, hi segur aski agertu ere egiten ez haizen protestetara. Baina noski, hire alderdiaren arabera horiek terroristak dituk eta zilegi duk zuen poliziak bidaltzea haiek egurtu eta atxilotzera. Esaidak: zenbat aldiz egin behar izan duk korrika polizien aurrean?

    • Amonamantangorri 2012-08-20 20:26

      Mutiko honek ba ote daki bere alderdi maitteak gobernua galdu baino lehenxeago Emilio Botini indultua eman ziola? Horiek al dira balio sozialak?

Utzi erantzuna

Zure e-posta helbidea ez da argitaratuko. Beharrezko eremuak * markatuta daude