Ireki da Zientzia Udalekuetan izena emateko epea

PO140-ZientziaUdalekuak

Martxoaren 19tik apirilaren 1era bitartean eman daiteke izena Zientzia Udalekuetan eta

12 eta 16 urte bitarteko 150 gaztek parte hartu ahal izango dute.

Zabaldu da Zientzia Udalekuetan izena emateko epea, eta  apirilaren 1a arte izango dute gazteek izena emateko aukera. Zientzia Udalekuak ekimena Elhuyar Fundazioak antolatzen du, eta Eusko Jaurlaritzako Hezkuntza, Unibertsitate eta Ikerketa Sailak laguntzen du. Ekimen honen  helburua da gazteek ondo pasatzea eta zientziarekiko jakin-mina piztea.

 

Hirugarren urtea da, jada, Zientzia Udalekuak antolatzen direla, eta aurreko urteetan oso gustura ibili ziren parte-hartzaileak. Iaz gazteek zein gurasoek bete zituzten gogobetetze-inkesten arabera, 8,9ko bataz besteko balorazioa eman zuten, Zientzia Udalekuetan gustura aritu ziren galdetu zitzaienean (0 balorazio oso negatiboa zen, eta 10, balorazio oso positiboa).

 

Zientzia Udalekuetan, gazteek zientzia-jarduerak eta aisialdi-ekintzak  uztartuko dituzte. Zientzia-esperimentu dibertigarrien bidez, ikasi egingo dute, eta natura ezagutzeko ekintzekin, gozatu, irteerak egin, urarekin jolastu eta beste abentura batzuk biziko dituzte. Primeran pasatuko dute!

 

Zientzia Udalekuak Oiartzungo Aiako Harriko Parke Naturalean egingo dira, Arritxulo aterpetxean. Aniztasun biologiko zein geologiko aparteko ingurunea da parke naturala, eta lekua esploratzeko aukera aparta izango dute gazteek, hango adituen laguntzarekin.

 

12 eta 16 urte bitarteko 150 gaztek izango dute Zientzia Udalekuez gozatzeko aukera. Uztailaren 2tik 22ra izango dira udalekuak, astebeteko hiru txandatan. Lehenengo bi txandetan, 12 eta 14 urte bitarteko gazteek jardungo dute (1998. edo 1999. urtean jaiotakoak), eta, hirugarren txandan, 14 eta 16 urte bitartekoek (1996. edo 1997. urtean jaiotakoak).

 

Txandak

Noiz

Jaiotza-urteak

Zenbat gazte

1. txanda

Uztailaren 2tik 8ra

1998 edo 1999

50

2. txanda

Uztailaren 9tik 15era

1998 edo 1999

50

3. txanda

Uztailaren 16tik 22ra

1996 edo 1997

50

 

Tokiak zozkatu egingo dira izena ematen duten guztien artean. Izena emateko edo informazio gehiago lortzeko, sartu http://udalekuak.elhuyar.org webgunean, edo deitu 943 36 30 40 telefono-zenbakira (ordutegia: 9:00-14:00).

 

Zientzia Udalekuen informazio-triptikoa.

udalekuak

Elhuyar 1972an jaio zen zientzia eta euskara uztartzeko asmoz. Elhuyarrek Kultur Elkarte bezala egin zituen lehen urratsak eta 2002an Fundazio bihurtu zen. Ordutik, Elhuyar Fundazioak etengabe dihardu lanean zientzia eta teknologia gizarteratzeko eta euskararen garapena bultzatzeko. Elhuyar Fundazioa irabazi asmorik gabeko erakundea da eta hainbat diru-iturriri esker dirau lanean: bazkideen ekarpenak, diru-laguntza publikoak eta Elhuyarrek ekoizten dituen produktuetatik lortutako mozkina. Elhuyarren xedea hauxe da: Euskara zientzian, teknologian eta gizartean sendotzen eta harentzako arlo berriak eraikitzen egiten dugu lan, euskal komunitate aktiboa eta kritikoa helburu.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude