Haurrak eta LGBT apologia

Haurrak eta LGBT apologia –

Mikel Garciak Argia aldizkariko Jendartean blogean.

Apologia arriskutsua irudituko zaio hainbati, LGBT banderak banatzeko haur-parkea aukeratu izana Irunen, ekainaren 28an. Umeak tartean direlarik, sexu askapenaren aldarrikapen edo ikusgarritasun hutsak umeen inozentzia perbertitzen duela uste dute batzuek, Disneyren azken filmarekin edo makillatzen den gizon irakaslearekin berriki ikusi dugun moduan. Alderantziz da ordea, beren identitatea eraikitzen, osatzen eta ezagutzen ari diren sasoian, zeinen baliagarria zaien ikustea abanikoa zabala dela.
Haurrak eta LGBT apologia

Gizonezko irakaslea eskolara makillatuta joaten da eta haurrentzat eredu desegokia dela salatu du guraso batek AEBetan. “Irakasleek ikasle guztiak ordezkatu behar dituzte eta pertsona normatibo asko dugu dagoeneko, hain normatibo ez diren eta ezberdin sentitzen eta espresatzen diren umeentzako ereduak ere behar ditugu”, erantzun du irakasleak.

Luca pelikulako bi mutiko protagonistak gay izan daitezkeela iradokitzea ere –filmak kontatzen duelako sekretu bat gordetzen dutela biek eta ezin dutela gizartearen aurrean diren bezalakoak agertu, ez lituzketelako onartuko– istorioa kutsatzea iruditu zaio heldu ugariri. Bi mutiko dira, besterik gabe, bi lagun, zertarako iradoki homosexualak direla? Baina galdera da: eta zergatik ez? Lagun izanik ere, zergatik ez suposatu gay izan daitezkeela, premisa denean heteroak direla? Zergatik beldur hori (Disneyk berak ezeztatzeraino)? Hainbatek adierazi du adin horietan homosexualitateaz hitz egitea umeak sexualizatzea dela, umeak nahastea… jasotzen dituzten mezu guztiek heterosexualitateaz hitz egingo ez balute bezala; horrek ez ditu nahasten, antza.

Besteen onarpena hain preziatu duten garaietan, zaila dute haurrek kanon hegemonikoetatik aldentzea, kanon horiek baino ez bazaizkie erakusten. Horregatik da hain inportantea errealitatea anitzagoa dela txiki-txikitatik azaltzea.

.

Nondik elikatu identitate eta bizitzak

Bai, badakigu, hotz handia egiten du korronte orokorretik at, baina norbere identitatea eraikitzeko, deseraikitzeko eta elikatzeko orduan, ez dezagun izan bakarrik kanon hegemonikoa ipar; bestelako ispilu eta erreferenteak ere jar ditzagun denon eskura, bizitza askeagoak helburu.

Haurrak eta LGBT apologia

Sarean, han eta hemen argitaratzen direnak harrapatzen, geure interesekoak direlakoan.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude