Duela bortz urtetik honat, matxismoaren aurkako lan ideologikoa egiten dugu, bertzeak bertze, Iruñeko San Nikolas kaleko 62.ean, bigarren solairuan, dagoen “Garelako naiz” elkartearen egoitza xumean. Gure sorrerako helburuen artean honakoa dugu: “Matxismoaren aurreiritzi okerrean murgildurik dabilen jendeari erakustea generoen arteko berdintasunean eta parekidetzan oinarritutako gizarte baten onurak”. Xede horri begira hitzaldiak ematen ditugu. Aldarazi nahi dugun jendea erakartzeko, gizonei lehentasuna ematen diegu aretoan. Emakumeak alboko atetik sartu behar dira eta ez sarrera nagusitik, eta atzeko bi ilaretan eseri behar dira. Bertzenaz zutik gelditu ahal dira, baina atzean beti ere. Hori dugu araua. Iduri luke jokabide horrek bazterkeria eragiten duela. Baina horrela matxista piloa erakarri dugu. Entzuleen artean figura galantak izaten ditugu: maltratadoreak, ultrak, opusianoak… Eta atzeko ilaretako banketetan emakumeren bat edo bertze.

 

Badakigu zer pentsatzen ari zaren. Guk ere, hasieran, ez genuen konfiantza handirik metodologian. Denborarekin, ordea, sinistuta gaude zuzen jokatzen ari garela. Ziur gaude nolabaiteko eragina dugula emakumeen diskriminaziorik gabeko gizartea lortzeko lanean. Hamarnaka zenbatu behar ditugun hitzaldi sortaren ondoren, gizon batzuek emakumeei etxetik ateratzeko eskubidea aitortzen diete. Are gehiago, matxista itxurako askok hagintzen digute tabernan emakumeekin batera poteatuko dutela. Zoritxarrez, gure begiekin gizon bakarren bat baizik ez dugu ikusi aulkitik altxatu eta atzeko banketetara joaten. Baina jarrera da garrantzitsuena. Entzule gehienek ikuspegia aldatu dute (aitortu beharra dago beti aurpegi berak ikusten ditugula, salbuespen batzuk kenduta).

 

Urrezko arauak zutik dirau eta iraunen du: emakumeak alboko atetik sartu beharko dira eta atzeko banketetan eseri edo zutik egon. Zeren eta gure helburua matxistak konbentzitzea da.

 

Kritika anitz jaso ditugu sarreraren eta aulkien bereizketa hori egiten dugulakotz. Baina adierazgarria da emakume batzuk ere bereizketa egitearen alde daudela, berdintasunaren izenean. Badakigu kritiken helburu bakarra gure aldeko elkartea eta lana zapuztea dela. Horregatik guk gureari eutsiko diogu, erranak erran.