Euskadiko Filmategia Film Artxiboen Nazioarteko Federazioan (FIAF) sartu da eskubide osoko kide gisa

Euskadiko Filmategia Film Artxiboen Nazioarteko Federazioan (FIAF) –

Euskal erakundea kide zen 1994tik, baina urrats historikoa eman du nazioarteko onarpen honekin.

2022ko apirilaren 24tik 29ra bitartean, Film Artxiboen Nazioarteko Federazioak (FIAF) urteroko biltzarra egin du Budapesten; Hungariako National Film Institutua izan da anfitrioia. FIAF erakundeko kide izatetik eskubide osoko kide izatera pasatzea eskatu zuen formalki Euskadiko Filmategiak, eta Batzorde Betearazleak txostena aztertu ondoren, Federazioa osatzen duten 93 zinematekek bozkatu egin dute.

Euskadiko Filmategia Film Artxiboen Nazioarteko Federazioan (FIAF) sartu da eskubide osoko kide gisaEuskadiko Filmategiaren eskaera formalak, erakundeari buruzko informazioaz gain, hautagaitzarentzat bereziki garrantzitsuak diren hiru berme-gutun jaso zituen: Eric Le Roy (Zinema eta Irudi Animatuaren Zentro Nazionaleko Zinematografia Ondarearen zuzendaria, Frantziako CNC), Josetxo Cerdán (Espainiako Filmategiko zuzendaria) eta Esteve Riambau (Kataluniako Filmategiko zuzendaria). FIAFeko Batzorde Betearazleak Euskadiko Filmategiaren txostena “bikaina” zela esan zuen. Horregatik, botoa emateko eskubidea duten nazioarteko 93 zinematekei aldeko botoa ematea gomendatu zien. Bozketaren ondorioz, Euskadiko Filmategia Federazioaren eskubide osoko kide izendatu zuten ofizialki (aurkako botorik ez eta abstentzio bat).

Joxean Fernandez Euskadiko Filmategiko zuzendariak atzoko bileran parte hartu eta erakundearentzat historikoa den urratsa azpimarratu zuen. Horri esker, besteak beste, arazoak eta irtenbideak arinago partekatu ahal izango dira nazioarteko beste erakunde batzuekin. Filmategiko arduradunak André Malrauxen hitzak ere ekarri zituen gogora –“kultura munduko nobleziaren herentzia da”, zioen idazleak–, eta gaineratu zuenez, Euskadiko Filmategiak uste osoa du ondare zinematografikoa arte horren edertasunaren eta nobleziaren herentzia dela. “Euskal Herria izena duen munduaren zati honetan hori egiteko ardura duen erakundea gara, baina FIAFeko filmoteka guztien eskutik egin nahi dugu, mugarik ez duten helburuak partekatzen ditugulako haiekin. XIX. mendean Gernikako arbolari buruzko  euskarazko abesti batek zioen bezala: eman ta zabal zazu fruitua munduan zehar. Euskal ondare zinematografikotik hori ere espero dugu pausu berri honi esker”, azaldu zuen Fernándezek.

Euskadiko Filmategiko zuzendariak oso modu positiboan baloratu du albistea: “Urrats historiko garrantzitsua da, arlo honetan lan egiten duen erakunde nagusiaren errekonozimendua. Era berean, gure funtzioak betetzen jarraitzeko eta ondare zinematografikoaren kontserbazioak eta hedapenak etorkizunean azalaratzen dituzten erronka ugariei aurre egiteko pizgarria da. Bidelagun ezin hobeak izango ditugu, nazioarteko familia bateko kide sentitzen baikara”.

.

Film Artxiboen Nazioarteko Federazioa (FIAF)

Film Artxiboen Federazioa (FIAF) munduko ondare zinematografikoa babesteko eta zabaltzeko lanean ari da 1938az geroztik, eta esparru horretako munduko irabazi-asmorik gabeko erakunde nagusiak biltzen ditu.

Bertako kideek filmak bilatzen, zaintzen, erakusten eta sustatzen lan egiten dute, artelan eta kultura gisa ulertuta, baita dokumentu historiko gisa ere. Bere sorreran, 1938an, FIAFek lau kide zituen eta, egun, 79 herrialdetako 171 erakunde hartzen ditu; ondare zinematografikoa mundu mailako kezka den isla. Gaur egun, Federazioa munduko filmoteka eta artxibo zinematografikoen sare garrantzitsuena da.

Euskadiko Filmategia Film Artxiboen Nazioarteko Federazioan (FIAF) sartu da eskubide osoko kide gisa

2 pentsamendu “Euskadiko Filmategia Film Artxiboen Nazioarteko Federazioan (FIAF) sartu da eskubide osoko kide gisa”-ri buruz

  • Zehaztearren. FIAFen webean ikus daitekeenez, EAEko filmategia asoziatuen taldean sartu dute (batez ere hiri eta eskualde mailako erakundeekin batera), ez ordea bozkatzeko eskubidea duten 93 kideen artean (bigarren talde honetan filmoteka estatal gehienak daude, bai eta Filmoteca de Catalunya ere).

  • Zure iruzkina zehaztearren. Euskadiko Filmategia 1994tik da FIAFeko kide asoziatua eta urte hoietan zehar FIAFek antolatutako hainbat kongresutan hartu du parte. Aurtengo kongresuan, eskubide osoko kide izendatu dute, hau da, edozein bozketetan parte hartzeko eskubidea izango du hemendik aurrera gainontzeko 92 kideekin. Eta ondo diozun bezala, Espainiako, Valentziako edo Kataluiniako filmoteken estatus bera izango du. Baita Cinèmatheque Françaiseren edo British Film Instituteren estatus berdina izango du hemendik aurrera. Eta zure iruzkina apur bat gehiago zehaztearren, Euskadiko Filmategiak Euskal Herri osoko ondare zinematografikoa jasotzen du eta kontsultagai dauka erkidegoen edo estatuen mugak kontutan izan gabe.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude