Errezeta: Izokin patea

Izokin patea

Arraina jateko mila era baino gehiago daude. Ez ditugu guztiak zerrendatu, baina ziur gaude. Plantxan, egosita, labean, barazkiekin, arrozarekin, pasteletan… eta baita patean ere. Normalean eginda erosi ohi ditugu pateak; ahate edota atun pateak dira ohikoenak. Baina, zergatik ez egin geure patea etxean? Izokin patea egingo dugu; hona hemen errezeta:

Osagaiak

  • 750 g izokin haragi fresko, hezur eta azalik gabe.
  • Izokin ketua, 3 xerra
  • Bi baso bete esnegain urtu
  • 150 g gurin
  • 2 tipulin, xehatuak
  • Zorrotada bat Xerez ardo
  • Piperbeltz eho berria eta gatza

Egiteko era

Uretan egosi dugu izokina. Horretarako, eltze batean ura gatz pixka batekin jarri eta irakiten hasi orduko sartuko dugu izokina bizpahiru zatitan, lehor ez dadin. Berriro irakiten hasi orduko kenduko dugu eltzea sutatik, barruan utziko dugu arraina epeltzen. Xukatu eta izpitu egingo dugu ondoren.

Kazola batean gurina su eztian jarri eta bertan gozatuko ditugu tipulinak, 15 bat minutuan. Izokin mami izpitua eta esnegaina erantsiko ditugu orduan. Irakiten utziko dugu guztia krematsu bihurtu eta bolumena murriztu arte, 10 bat minutu guztira. Gatza eman eta zorrotada on bat xerez gehituko dugu ondoren. Ez du saldatsu gelditu behar eta su eztian egin behar da.

Nahastura irabiagailu baten ontzian sartu eta indarrik handienean eragingo diogu ondoren makinari. Izokin ketua erantsi eta ahi mehe guztiz xehatua bat lortuko dugu ondoren. Gatz-puntua neurtu, zuzendu, eta piperbeltza erantsiko dugu ondoren. Portzelanazko terrina batera edo gopor tapadunetara isuriko dugu ahia, hozkailuan itxita gorde ahal izateko. Gutxienik pare bat orduan edukiko dugu hozkailuan freskatzen. Irmotutakoan ogi txigortuetan igurtzirik edo, haurren kasuan, ogitartekoetan kontsumituko dugu patea.

Patea txikientzat bada, uretan egosi beharrean esnetan egos daiteke, elikagaia mamitsuagoa izan dadin. Bestalde, ez dugu Xerezko ardorik erantsiko, baliteke bestela haurrei gehitxo gustatzea eta okerreko bidetik abiatzea.

 On egin!