Erdarari kateatuta

Erdarari kateatutaIkastolen elkarteko lehendakariak, Koldo Tellituk, “Arbitraia, euskararentzat zailtasunez beteriko beste eremu bat” artikulua idatzi du Ereiaron, eskola-kirolaren eremuan ematen den hizkuntza erabileraren inguruan kezkatuta.
Horra bertatik ekarritako pasarte bat:

“… eskolaz kanpoko jardueren eremuan, hizkuntza normalkuntza beharrean dagoen beste arlo bat, kirolarena, zeinetan ikastetxeetan egiten den lana ezerezean geratzen da arbitroek euskaraz hitzegiteko gaitasunik ez baldin badute. Nahiz eta euskaraz entrenatzeko gaitasuna duten entrenatzaileak izan, partidua jokatzen ari denean gaztelaniaz aritu beharrean jartzen baditugu gure jokalariak, azken batean, egunero-egunero egiten dugun lana ezerezean geratzen da, berriro ere benetan jakin behar den eta balio duen hizkuntza gaztelania dela barneratzen dute, euskaraz jakitea oso ondo dagoela baina, arbitroak azalpenak gaztelaniaz ematen dituela “guztiontzako”.
Arrazoi osoa du Tellituk, hasi eta buka.
Eta harrigarria da, EAEn behintzat erakunde propioak dauzkagularik, horrela ibiltzea oraindik ere, eskola arteko lehiaketa ofizialetan ere euskaraz normaltasunez ezin jardun.

Edonola ere, Tellituk salatzen duen egoera, beste eremu askotara eraman daiteke, ezertxo ere aldatu barik. Adibidez:
ikastetxeetan egiten den lana ezerezean geratzen da, gurasoek euskaraz hitz egiteko gaitasunik ez baldin badute, edota euskaraz jakin arren euren artean erdaraz egiten badute, edota lagun artean euskaraz egiten badute…
Edota, ikastetxeetan egiten den lana ezerezean geratzen da, herrian euskarak presentziarik ez badu apenas, gazteen erreferente guztiek, heldu nahiz gazte, erdaraz jarduten badute, kultur eta aisialdiko eskaintza nagusiki erdaraz bada, euren gustuen araberako euskarazko telebista katerik ez badago, …
Eta, ikastetxeetan egiten den lana ezerezean geratzen da, ikastetxeak berak gurasoekiko harremanetan erdarari lehentasuna ematen badio, gurasoei zuzendutako jarduerak erdara hutsezkoak badira, eta abar.

Zeren horretaz guztiaz ere konturatzen baitira gazte begiluzeok, eta ohartzen dira, benetan jakin behar diren eta balio duten hizkuntzak espainiera eta frantsesa direla, euskaraz ikastera bidaltzen dituzten guraso gehienek euskara gutxi edo batere ez dutela erabiltzen, gero fokoa gazteongan jartzen badute ere.

Badakizue, seme-alabok… Zuek ez “erre”, ez “edan”, eta euskaraz egin.
Geronek ez bezala.

Erdarari kateatuta

4 pentsamendu “Erdarari kateatuta”-ri buruz

  • Peru Dulantz 2014-02-10 15:10

    Ados, Itzain. Ezererzezean esatea, agian, gehitxo da, baina neurri handi batean alferrik galdu egiten dela ezin uka.

  • Jasotako mezu bat:
    .
    “Gure pentsatzeko modua eskuaraz da; hau da, zerbait erran behar dugularik beti eskuaraz pentsatzen dut
    eta ez zait justua iruditzen erdaraz egin behar izatea”
    “Ikusi eta zabaldu behean ageri den bideoa, mediku euskalduna nahi dut!”
    .
    “BAZTANEN MEDIKU ESKUALDUNA NAHI DUT”
    http://vimeo.com/84853643

  • Pello Andrearriaga 2014-02-11 00:29

    Ados nagok Koldo Tellituk esaten duenarekin, berak, arbitroei buruz hitz egiten dik, baina, eta entrenatzaileak? Oraintxe bertan, Ibai Gomezi, Athletic-eko jokalariari buruzko bideo bat ikusi diat, Santutxu, bere auzoko futbol taldea entrenatzen omen dik bere denbora libreetan, noski gazteleraz, nola bestela.

  • Koldo Tellitu 2014-02-16 16:51

    Arrazoia duzu Pello entrenatzaileen gaia aipatuz. Entrenatzailetaz ere artikulu bat egin nuen orain dela 2 hilabete; http://kanalak.berria.info/euskara/kolaboratzaileak/115/entrenatzaileeuskaldunabehar_dugu.htm

Utzi erantzuna

Zure e-posta helbidea ez da argitaratuko. Beharrezko eremuak * markatuta daude