Editoriala

NDM0NA==

(Editoriala grabatu egin dute Antxeta Irratikoek)

NDM0OA==

Euskarazko hedabideak, beste jauzi baterako ordua.

Euskarazko hedabideen historia jarraitu duenak, badaki azken 30 urteetako abaroan egin dela biderik emankorrena. Eta badaki denbora horretan emandako aurrerapausoa itzela dela. Gaur egun 400.000tik gora biztanlek kontsumitzen ditu euskarazko hedabideak, 2008ko Eusko Jaurlaritzaren ikerketa baten arabera. 

Komunikazioa da gure ardatza, inguratzen gaituen mundua nola ikusten dugun kontatzea, ikusmolde eta euskarri anitzez. Elkarren lehian eta elkarren osagarri. Hori da lokaletik globalera egiten dugun ekarpen nagusia, hizkuntza, euskaraz egiten duguna. Harro gaude egindako bide horrekin, eta gure euskaltasunetik munduaren ikuskera ugari eskaintzen ditugu. 

Baina ez da nahiko, ibilbide horretan sakondu behar dugu, orain artekoa hobetuz eta zabalduz. Edozelako gizarte eta kultura modernoren geroan giltzarri da hedabideen zeregina. Printzipio eta helburuetan letra larriz aitortzen da garrantzi hori, baina sostengu ekonomikoan ez, ez behintzat hedabide ez publikoei dagokienez. Ezagun da EAE, Nafarroa eta Ipar Euskal Herrian oso egoera desberdinak bizi direla: Nafarroan eta Iparraldean erakundeen sostengua hutsala da; EAEn oso bestelakoa da, baina ez nahikoa, aurrean ditugun erronkei begira eusteko adinakoa ez bederen.

Hedabide ugari ari dira ixten munduan, gureen aldean handi eta indartsuak izandakoak. Eta guk ere enbataren erdian dihardugu. Publizitatea behera, salmentak ere bai, diru-laguntzak urritzeko joeran… Noiz arte eutsi ahal izango diogu? 

Bankuen, autoen, altzari eta elektratresnen salbamendu garaian, guk ere sostengu sendoagoa aldarrikatzen dugu. Maiz aurpegiratu zaigu diru publikotik bizi garela, bai euskal kultura, bai euskarazko hedabideak, konplexua sortzeraino ere bai agian. Orain, ostera, inoiz baino argiago ikusten da nola giltzarritzat jotzen diren esparru eta proiektuetan, erakunde publikoek dirutzak bideratzen dituzten, izan hauek eremu publiko edo pribatukoak.

Eta ekonomikoki ere sektore garrantzitsua da euskarazko hedabide ez publikoena: 600 langiletik gora ari gara bertan, hilero soldata etxera eramanez eta euskal gizartearen aberastasunean gure alea jarriz.

Azken 30 urteetan ibilbide oparoa egin dugu, baina bada ordua beste jauzi bat emateko. Gure konpromisoa hemen dago, egunerokoan ikusgai. Oraingoan, herri erakunde publikoen sostengu ekonomiko handiagoa aldarrikatzera gatoz, errepide, trenbide edo eraikuntza handien zati txiki batek gure etorkizuna berma dezakeelako. Euskarazko komunikazioak merezi du tamainako apustua eta euskal kulturak ere bai.

 

Sinatzaileak:

Aiurri/Aizu!/Aldiri/Antxeta irratia/Arabako Hitza/Argia/Berria/Berton aldizkaria/Bertsolari aldizkaria/BidasoaMedia/BilboHiria irratia/Bizkaiko Hitza/Elhuyar/Entzun!/Esan-Erran irratia/Galtzaundi Euskara Taldea/Gaur8/Gaztezulo/Gipuzkoako Hitza/Goiena/Goierriko Hitza/Guaixe/Gure Irratia/Hala Bedi/Hernaniko Kronika/Herria astekaria/Hik hasi/ Info 7/ Ipar Euskal Herriko Hitza/ Irria/ Irulegiko Irratia/ Irutxuloko Hitza/ Jakin/ Karkara/ Kazeta.info/ Koska Irratia/ Lea-Artibai, Mutriku eta Busuturialdeko Hitza/ Mailope/ Nafarroako Hitza/ Noaua! aldizkaria/ Nontzeberri/ Nora/ Oarso Bidasoako Hitza/ Pausuirratia.net/ Pil-pilean aldizkaria/ Prest! aldizkaria/ Pulunpe aldizkaria/ Sustatu.com/Tolosaldeko eta Leitzaldeko Hitza/ Ttipi-Ttapa aldizkaria/ Txintxarri aldizkaria/ UK aldizkaria/ UKBerri/ Urola Kostako Hitza/ Uztaro/ Uztarria/ Xiberoko Botza/ Xorroxin Irratia/ Zuhatza Berriketan/ZuZeu.com

Editoriala

Irudia | Bidegurutzea? | UmbrellaShot | Creative Commons By SA
Artxiboa | Editoriala | Antxeta Irratia | Creative Commons By SA
Euskarazko hedabideak
ZuZeu

ZuZeuko erredakzioko kazetariak eta editoreak gara.

6 pentsamendu “Editoriala”-ri buruz

  • ZuZeu

    […] This post was mentioned on Twitter by zuzeu, Joseba Kamio and Oier Aranzabal, Iñigo Arandia. Iñigo Arandia said: RT @zuzeu Editoriala: http://bit.ly/dLNsjl […]

  • Iñigo Rubert 2011-02-01 08:13

    Hori al zen dena? Eskaerarekin guztiz bat nator, nola ez. Baina horrelako ekimen bateratu eta berria horretarako sortu izana, finantziazioa baino arazo askoz sakonagoa dugula uzten du agerian.

  • Patxi Gaztelumendi

    @Iñigo
    Katalanen editorial bateratuen eredutik, amets egin dezagun, bestelako editorialak ere posible diren ideia horrekin.

    Editorialak idazten jarrita:
    http://www.larrabetzu.org/gaztelumendi/?p=1693

    Nire iritziak bota ditut Info7 irratian eta blogean.

    Eztabaida garrantzitsua da, dudarik gabe.

  • Jon Altza

    Zuzeu.com-eko agiriaren bertsio honi zati bat falta zaio, ezta? Paragrafo oso bat? Ez dut aurkitu euskal Yri egindako erreferentzia zuzenik, zeharka aipatzen bada ere…
    Mesedez, norbaitek konbentzi nazala gaizki ez pentsatzeko; esplika diezadala argitaratzeko moduan hedabide bakoitzaren esku utzi dela azken paragrafoa, edo akats bat izan dela, edo… Zerbait!

  • ZuZeu

    Kokoteko, editoriala bi neurritakoa izan zitekeela zegoen onartua, guk motza argitaratzea erabaki dugu, horrexegatik bakarrik: irakurterrazagoa delakoan. Hala ere, oker ez bagaude, ahozko bertsioan osorik duzu.

  • Iñigo Rubert 2011-02-01 23:02

    Egia esan, bat nator zure irakurketa baikorrarekin Patxi. Esandakoak esanda daude baina produktibitateko gururen batek dioen moduan, “egunerokoa kontrolatua izan behar duzu helburu handiagoez arduratu ahal izateko”. Ea biziraupena helburu duen honek helburu handiagoen aldeko bidea irekitzen duen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude