EAJ hegemonikoago eta aldaketaren aldeko indarrak gora

Atzoko emaitzak aztertuta, ertz eta norabide askotako analisiak egitea tokatzen da. Eta faktore asko dira aztertu beharrekoak, joera asko baloratu beharrekoak, datu ugari ondo irakurri beharrekoak.

Lehen kolpean, dena den, garbi geratu dira zenbait kontu. Batetik, ezker soberanistek eta EAJk hegemonia politikoaren bidean duten bataila historikoan jeltzaleek partida irabazi dutela, hau da, gaur, atzo baino hegemonikoagoak direla, horri egin ahal zaizkion ñabardura guztiekin.

Bigarrenik, Bizkaian eta Araban ezker soberanistak izan duen aurrerapena erabat zapuztu du Gipuzkoako emaitzak. Nik inondik espero ez nuena, eta analisi gehienek ere espero ez zutena gertatu da: Eh Bilduren jaitsiera oso nabarmena. Honek esan nahi duena da, azkenean, Gipuzkoa izan dela hauteskunde hauetako klabea, nik begirada Bizkaian jarria banuen ere.

Hirugarrenik, 2009arekin alderatuta, PNVk 16.035 boto galdu ditu, PSEk 106.163 eta PPk 16.241. UPyDk ere 741 boto galdu ditu. Guztira bloke honek 139.180 boto galdu ditu hiru urte t’erdian. Ezker soberanisten koalizioak 201.651 boto batzen zituen 2009an (D3Mrenak zenbatuta: iturria: naiz.info). Beraz, 75.338 boto irabazi ditu. IU eta EBren batuketak, bere aldetik, 11.107 boto gehiago atera ditu, eta Equoren presentziak 11.639 boto gehitzen dizkio PP-PSE-PNV (+UPyD) bloketik at dauden indarrei. Guztira, beraz, 98.084 botoko igoera 2009tik.

Hau da, Udal eta Aldundietako hautes zikloak, Orokorretako hautes zikloak eta Autonomikoetakoak aparte aztertzen baditugu, hegemonia batailaren ikuspuntutik, EAJk posizioak galdu ditu babes elektoralari dagokionean. Eta politikaren aldaketaren alde dauden indarrek asko irabazi dute.

Honek ez gaitu, inondik ere, Eh Bilduren emaitzen azterketa positibo batera eraman behar. Ni behintzat, ez narama. EAJ eta Eh Bildu guda-zelai autonomikoan benetan zein posiziotan dauden argitu da, eta oso garbi geratu da EAJk terreno honetan alde nabarmena ateratzen diola ezker soberanistaren koalizioari.

Eh Bilduk aztertu egin beharko du faktore hori, hau da, zergatik ez da trasladatu, batez ere Gipuzkoan, beste hautes zikloetako indarra Gasteizeko Parlamenturako hauteskundeetara? Bestalde, Ezkerraldea eta Gasteizeko emaitza bikainek (eta Bilbo handiko emaitza onek), adierazten dute Eh Bilduk lortu duela penetrazio elektoral bat lehen iritsi ez zen lekuetan. Oso datu esanguratsua da hori: segmentu ez-abertzaleak erakartzea lortu du.

EAJk, bere partetik, badu zer pentsatua Bizkaian eta Araban. Xeheago aztertuko ditugu beste post batean lurraldekako emaitzak, herri klabeak eta abar. Baina terreno honetan EAJk behera egin du; hori normaltzat jo daiteke, eta emaitza logikotzat jo. Baina hegemoniaren batailan posizioak galdu ditu hautes ziklo honetan.

PSEk eserlekuetan emaitza txukuntzea lortu du. Botoetan sekulako danbatekoa jaso du, nik espero nuena baino handiagoa. Gipuzkoan EAJrako trasbasea izan den aztertu beharko da, batez ere Donostia eta Zarautz bezalako guneetan. Bizkaian eta Araban ez dirudi trasbase hori eman denik.

PPren Abandoko datua esanguratsua da: EAJk asko irabazten du hor. Oro har,2009ko emaitza kaxkarrak jaitsi ditu Basagoitiren hautagaitzak. Diputatutan, salbatu da, nahiz EAJrekin 38 ez batu.

Aurreko biak jaitsi arren, UPyD ez da igo. Baina hara zer diren aritmetika bihurriak. PNV + PP = 37 eserleku. EH Bildu + PSE = 37 eserleku. Falta dena 38rako? Voilá: Maneiro. Ondorioz, Rosa Diezek aurkeztu duen mutilak protagonismo handia izango du datozen lau urteetan.

Ezker Anitza eta Ezker Batuaren aferan, Ezker Anitza erraz gailendu da, espero zitekeenez. Telebistak eta izenaren nahasmenak galduarazi dizkiote IUren markari hiru eserlekuak (hori ezean, sinetsita nago, lortuko zituztela) Eta, esan beharra dago, horrek EAJri egin diola mesede.

Jatorrizkoa Toliati blogean.

EAE, hauteskundeak, ion ansa, toliati

19 pentsamendu “EAJ hegemonikoago eta aldaketaren aldeko indarrak gora”-ri buruz

  • Zer gertatu da Gipuzkoan? Herri nahiz Aldundirako hauteskundeetan “bihotzarekin” bozkatu zuen askok (Bildu legeztatu berri, emozioz beteriko hasteak izan ziren), oraingo honetan “buruarekin” bozkatu duela, EAJren kudeaketa ezaguna hobetsiz inolako “abentura” ezkertiarraren aurrean? Hala bada, aldaketa sozialerako orain EH Bildu edo ezkertiar alderdi txikiagoei bozka eman dietenekin kontatu behar da. Eta EH Bildun bertan ere agian denak ez dira benetako politika ezkertiarren zaleak… Pena ematen dit, baina, horrelako zer edo zer gertatu izan da?

  • Ez dira NOLAKO estatua nahi dugun eztabaidatzeko garaiak. Estatua NOLA lortu ezatabaidatzeko garaia da! Batu eta ekin diezaiogun.

  • Zer gertatu den Gipuzkuan? EhBildu “en acción” ikusi dutela eta ulertzen hasiak dira esatetik egitera pausua badela. Lagun asko dago naskatuta, boterea askatasuna lortzeko behar zala esan eta basurak kudeatzeko erabili dela ikustean.

    • Eta PNV-k askatasuna lortzeko erabili al du boterea, ba?
      Harritzen nau nola mesprezatzen den zaborren kudeaketaren gaia, komuneko paper zikin batzuez ari bagina bezala; zeren, hori baino gehiago da: erraustegi kutsatzaile eta minbizi-eragile bat egitea, norberaren hondakinen (eta, zeharka, norbere bizitzaren) ardura norberak hartzea, gizarte arduratsu eta parte hartzailea, “erabili eta bota (eta erre)” eredu kapitalistari aurre egitea… Bildu soberanista da, baina ezkertiarra ere bai, eta gizarte gaiei heldu beharra die.
      Gogoratu beharra al dago Gipuzkoako Aldundiak diru-laguntza bat jarri duela Lanbidek diru-sarrerarik gabe uzten duen jendearentzat?
      Eta Aldundiak berak euskarari eman dion lehentasunaz, zer diote nazkatuta dauden horiek?
      Atez atekoa aspaldi jarritako herrietan (Oiartzun, Hernani, Usurbil…) EH Bildu izan da berriz ere lehen indarra, alde handiz.
      Nik uste dut gehiago izan dela PNV-k bere komunikabideen bitartez egin duen joko zikinaren ondorioa.
      Baina, hala ere, Bilduri ongi etorriko zaizkio Gipuzkoako emaitzak, hankak lurrean izan ditzan, dena irabazita dagoela pentsatu gabe. Oraindik lan handia du egiteko, kalean, herriz herri, gizarte eragileekin batera alternatibak proposatuz, eskuin autonomistaren eredua krisi-eragileari aurre egiteko.
      Independentziari dagokionez, aukera ezin hobea dute PNV-k eta EH Bilduk aurrerapausoak adosteko. Gaitasunik izango ote duten, ikusteke dago oraindik.

      • “Eta PNV-k askatasuna lortzeko erabili al du boterea, ba?”
        Orain Gipuzkoan EhBildurekin gertatzen den bezela, PNv-k ere ez du sekula botererik eduki.

      • Aupa Hi!
        Niri ez zait iruditzen Gipuzkoako kudeaketa ustez oker baten ondorio denik EH Bilduk pairatu duen galera. Atzo gertatutakoak gauza bat beti kontuan izateko balio behar liguke, hala ere: ezker subiranista bagara gobernura iristean errotiko aldaketak egiten hasi behar dugu eta horrek hainbat pertsona uxatu ahalko du. Ez dut uste oraingoan hori gertatu denik, zuzen-zuzenean, baina gertatu izan bada hein batean normaltasunez hartu behar genuke. Gipuzkoako kudeaketari buruzko hausnarketa sakon eta zorrotza egitea komeni da (gure ideietatik hurbil gabiltzan, parte hartzea sustatzen ari garen, zein kontraesanetan erortzen ari garen…), baina ez hauteskunde hauen edo beste batzuen emaitzek horretara bultzatuta, baizik eta berez izan behar genukeen autokritikarako joerak eraginda.

    • Nik neure buruari 2012-10-22 17:43

      Errepasatu ondorengo zuzenketa bat:
      Zer gertatu den Gipuzkuan? EhBildu “en acción” ikusi dutela eta ulertzen hasiak dira esatetik egitera pausua badela. Lagun asko dago naskatuta, INSTITUZIOAK KUDEATZEA askatasuna lortzeko behar zela esan eta basurak kudeatzeko erabili dela ikustean.

  • EAJ “aldaketaren aldeko indarra” da? Noiztik? Nik beti (Lizarra-Garazin izan ezik) ikusi dut “dagoenaren aldeko indarra” moduan aritzen, espainolistekin eskuz esku.
    .
    Datu batzuk:
    .
    EAE Autonomikoak 2012 : EH Bildu: 276.989 – % 24,48
    .
    EAE Autonomikoak 1998: Euskal Herritarrok: 224.001 – %17,91
    “ : Eusko Alkartasuna: 108.635 – % 8,69
    “ = % 26,60
    .
    Espainiarren ezarpena bete betean, oinarri demokratikorik gabe, Estatuarentzat asimila ezinak diren borroka moldeak indargabetuta, sektore borrokalarienak uxatzea, sektore “moderatuen” botoa bilatzea eta uzten digutena kudeatzeak ez dirudi hain ideia ona. Tsunami-puxika desinflatzen ari da eta esne-saltzailearen ipuina (edo hauteskunde euforia) amaierara heltzen ari dela dirudi.
    .
    Beste galdera bat; zenbat denbora beharko du EAJk, PPSOEren babesarekin, Gipuzkoan zentsura mozioa aurkezteko?

    • Bistan da 1998an EAn zeuden guztiak ez daudela EH Bildun (gogoratu H1, Begoña Hegazti…), baina bistan da, baita ere, EH Bilduk ez duela lortu oraindik Euskal Herritarrok-eko jende guztia biltzea. Baina, Larrea, ez ahaztu EH-k emaitza hori ETAren su-etena eman berritan lortu zuela. Hau esaten dizut kontuan har dezazun indarrak biltzeko (ETAk ere bilatzen zuen bezala) ETAren jarduna etetea ezinbestekoa dela eta EH-ren emaitzak su-eten hori saritzeko izan zirela; kontuan hartu beharko zenukeen bezala zein emaitza lortu diren ETA jardunean zebilen azken urteetan (azken kasu horretan, ez bakarrik hauteskunde emaitzak, negoziazioetakoak ere bai, hain zuzen ere indar sozial eskasarekin joateagatik).
      *Honi lotuta, zure analisian akats bat ikusten dut: “estatuarentzat asimila ezin den borroka moldea” deitzen duzun hori, ederki asimilatuta dauka estatuak, eta oraindik horretaz egiten duen erabilerak frogatzen du.
      Bide instituzional soilak ez gaitu garaipenera eramango, horretarako EAEn eta Nafarroan gehiengo absolutuak beharko genituzke (eta ez dirudi lorgarria denik epe ertainean). Hortaz, instituzioetan akordioak bilatu beharko ditugu estatua kinka batean jartzeko, Kataluniaren bidetik, eta estatuaren ezezko erantzunaz independentismoa indartu. Bestetik, nazio eraikuntza lehenbailehen berraktibatu beharra dago, Europa mendebaldeko independentzia olatuak lurraldea ahalik eta egituratuen ediren dezan.

      • Kaixo Hi.
        .
        Orain arte Ezker Abertzaleari boto eman diotenen artean denetarik dago, noski, baina Euskal Herritarrok-i boto eman ziotenek “ETAren suetena saritzeko” eman zutela esatea gehiegitxo iruditzen zait. Nire ustez borroka molde desberdinen uztarketa egokiaren emaitza izan ziren.
        .
        Diozu: “kontuan hartu beharko zenukeen bezala zein emaitza lortu diren ETA jardunean zebilen azken urteetan”…. Ze arraroa, ahaztu zaizu ilegalak ginela?. Dena dela eta zure iritzia ukatuz Iniziatiba Internazionalistaren (2009) emaitzeei buruz honako hau esaten zuen Otegik:
        .
        “Arnaldo Otegi se mostró más que satisfecho con los resultados electorales logrados por la izquierda abertzale a través de la candidatura Iniciativa Internacionalista y aseguró que ha salido «absolutamente fortalecida» de estos comicios. El político de Elgoibar no quiso olvidar que la izquierda abertzale ha conseguido estos resultados bajo una marca que no era la suya, por estar impedida de poder concurrir en los comicios…
        … El militante abertzale se congratuló, pese a todo, de haber demostrado que la izquierda abertzale «es una fuerza importante, que alcanza cotas de representación muy importantes y que tiene una extensión social y electoral homogénea» en todo el país….”
        (“Los buenos resultados refuerzan la apuesta de la izquierda abertzale por el cambio político y social”)
        http://www.gara.net/bereziak/e7Hauteskundeak/artikuluak/artes141973/Los-buenos-resultados-refuerzan-apuesta-izquierda-abertzale-cambio-politico-social
        .
        Hitz egiten duzu “indarrak biltzea” eta “indar sozial” handitzeari buruz, baina nire ustez orain arte ikusi duguna hauteskunde koalizio bat baino ez da izan. Nik behintzat ez dut ikusten duela, esaterako, hiru urte zegoena baino “indar sozial” gehiago.
        .
        Estatuak borroka armatua asimilatuta zeukala diozu, eta frogatzat diozu “eta oraindik horretaz egiten duen erabilerak frogatzen du”. Ez dakit oso ongi zer esan nahi duzun baina ikusita zenbat ahalegina egin zuen estrategia politiko-militarrarekin amaitzeko (RuGalcabaren “votos o bombas”) nik zuk esaten duzunaren kontrakoa ondorioztatzen dut; nahiago dute, baita lortu ere, gu sartzea haiek erabat kontrolatzen duten Espainiar Legediaren bide hutsean, inolako borroka molde bortitzik edota ilegalik gabe.
        .
        Diozu: “..instituzioetan akordioak bilatu beharko ditugu estatua kinka batean jartzeko, Kataluniaren bidetik… ” Bueno, falta zaizu esatea norekin lortu daitezkeen akordio horiek; agian espainolisten botoa bilatu baita lortu ere egin duen EAJrekin? Eta beste aldetik, Katalunian ikusiko dugu noraino helduko den CiU, baina EAJk jada esan du ez dituela haien urratsak jarraituko. Dena dela, katalanek aurrera egitekotan topo egingo dute guk dauzkagun oztopo berberekin: espainiarren Konstituzioa, legeak, epaileak, kartzelak eta armadarekin. Badakit Europar Batasunak babestuko gaituela diotela orain gure ordezkari, baina niri horrek barregura sortzen dit.
        .
        Amaitzeko beste datu batzuk:
        .
        EAE Autonomikoak 1986 : Herri Batasuna: 199.900– %17,47
        .
        EAE Autonomikoak 1986: Eusko Alkartasuna: 181.175– %15,84

        1986an=%17,47+ %15,84= %33,31 (2012an EH Bildu: % 24,48)
        .
        Zure hasierako argudioa egia izango balitz: HBren 1986ko emaitzak, (edo Iniziatiba Internazionalistarenak 2009an) “borroka armatua” saritzeko izan ote ziren?

  • Oier Aranzabal

    Gipuzkoan gertatu dena, Zarautzen gertatu denaren antzekoa iruditzen zait. Hemen nire iritzia.

  • “Egunkari batean lan egingo ez banu, esango nuke Gipuzkoan komunikabide indartsu batek irabazi dituela hauteskundeak”. Atzo gaueko hitzak dira, Martxelo Otamendirenak.

    Informazioa kontrolatzen duenak mundua kontrolatzen du. Ezetz asmatu zein den Gipuzkoan masiboki saltzen den egunkaria, Berria edo Gararen oso gainetik?

  • Hiru puntutan.

    1.-Ezker abertzaleak hegemoniagatiko borroka aitatzen du. Hegemoniarik ez du sekula lortuko. Arrazoia: Bilbo. Bilbon eta inguruetan laugarren indarra den alderdia ez da inoiz hegemonikoa izango EAEn. Bildu, Eh-Bildu eta Amaiur laugarren indarra izan dira barruti horretan. Eta ez da ezer bereziki gaizki egin dutenik. Kontua da Euskal Herriko bazter horretako jendearen gehiengoari ezker abertzalearen eskaintza interesatzen.

    2.-Edo epelegiak izan direlako, edo beroegiak izan direlako, Gipuzkoako bozka galera sahiestezina, akaso. Baina gauzak nola diren, eskainua EAJren aldera beharrean, Bildurenera eroriko den egunean, batak 26 eserleku izango ditu eta besteak 22. Ez dirudi hain alde handia ere, ezta?

    3.-Uste du PSEk eta PPk sekulako emaitzak atera dituztela, espainolismoak izugarrizko indarra duela EAEn. Espainia kiebrara eraman duten bi partidu, bake prozesua delakoa dela-eta mendekuaren diskurtsoa elikatu dutenak, besteak beste, eta zer eta bozka kopuruaren %40 ?!! Joder, indestruktibleak dira!!

    • Xabier Makazaga 2012-10-22 22:10

      PP + PSOE = %40 ??
      Kontuak egiten nahiko txarra zara. %30 baina gehixeago eta kito. Asko direla oraindik? Bai, baina PNV + EH BIlduren erdia, gutxi gora behera.

      • Kontuak egiten txarra. Baina OSO txarra, hitzak aukeratzen, Xabier. “Bozka” dagoen tokian, jarri “eserleku”. PP+PSE+UPyD=%36, hogeitamarretik baino gertuago berrogeitik. Falta den %4 hartu probokaziotxo gisa 😉 edo bestela hartu PNVri mailegatu dizkiotenetatik.

        Eta, dena dela ere, esandakoa, asko dira. Ezker abertzalearen boto-emaileak fidelak direla eta, esaten da; baina benetan azterketa sakona eta serioa behar duena unionista hauen irredentismoa da.

  • I.Larreak dio “Beste galdera bat; zenbat denbora beharko du EAJk, PPSOEren babesarekin, Gipuzkoan zentsura mozioa aurkezteko?”

    Ba nik uste dut ez duela egingo:
    batetik, ez dut uste gerra horretan sartzea komeni zaionik (abertzaleen aurrean izango lukeen ondorioengatik) eta nahiago izango duela egungo oreka instituzionala nolabait kudeatu (Legebiltzarrean batu du lasaitasun punttua izateko beste kopuru)
    bestalde, uste dut interesatzen zaiola Bildu karguan legislatura osoan uztea Gipuzkoan eta Donostian: desgastea nabariko zaio, ez dago posizio erosoan Bildu, eta hauteskunde hauetan nabaritu diren olatu amaiera zantzuak areagotu egingo dira hurrengoetan. Edo hori uste dut pentsatzen duela PNVk.

  • Kaixo Ipuscoa.
    .
    Hobeto horrela bada, zure argudioak nahiko zentzuzkoak iruditzen zaizkit.
    .
    Hala ere, ez dugu ahaztu behar aurrekariak badaudela; 1991an eta EAren Ramón Labayen Alkatetzatik kentzeko EAJk PSOEren Elorzari eman zion botoa eta urte horretatik espainolistak egon dira 20 urtez Donostiako alkatetzan.

  • Hain zuzen, garai hartzan egindako reparto-akordio handi horren ondorioa (funtsean Donostia eta Gasteiz banatzea zuena, beste herri batzuren artean) hainbeste pairatu izanagatik, ez dut uste PNVk akats berdina egingo duenik. Ezer gutxi irabazteko duenean.

    Gipuzkoan, eta bereziki Donostian, ez dut uste oso feeling ona dagoenik sozialisten eta jeltzaleen artean.
    Bilduk garesti ordain lezake Gipuzkoan eta Donostian jasango duen markajea, nahiko marroitzat uler dezakegun legislatura (krisiaren alde bortitzena) jaten utzi eta gero aukera hobeak izan ditzakeela pentsa lezake PNVk. Uste dut handira ordagoan bi instituzioak lortzeko pentsamenduan daudela, epe motzean enbido txikian Gipuzkoa hartu eta Donostia sozialistei erregalatu ordez.

    Posizio erosoa du legebiltzarrean. Zaila izango da arriskuan jar lezakeen blokea aurrean izatea. Eta, zeinek daki, horrela Gipuzko ta Donosiko aulkiak kendu gabe, errazago lor lezake Bilduren eskua, zerbaiterako behar izanez gero.

  • Urtzi Urrutikoetxea

    Ados Bilbo Handia dela ezker abertzalearen arazo handiena (estrukturala esan du norbaitek, Gipuzkoakoa koiunturala litzatekeen artean). Baina, xume bada ere, aurrera egin du hauteskundeotan, nahikoa nabarmen Ezkerraldean. Hirugarren indarra da Ezkerraldeko udaletan, eta Bizkaian, Ermuan eta Bilbon soilik da laugarrena, gainontzeko guztietan hirugarren, bigarren edo lehena, beti PPren aurretik Getxon izan ezik (baina hor PSE dauka atzetik). Gure auzoa akaso lagin txikiegia da, baina esanguratsua da: auzo berria, ume txikiak dituen jende gazteak osatua, bigarren izan da Bildu Udalekoetan eta Legebiltzarrekoetan, eta Espainiakoetan hirugarren. Hau da, EAJ beti lehenengo lekuan, eta 2-3.eko lehian Bildu eta PSE. Baina paradoxikoki, auzoko taberna mordoan bestelako giroa nabari da: El Correo eta Deia denetan daude, BERRIA bakar batean ere ez, GARA behin ikusi dudala uste dut, eta El Mundo eta El Pais ere taberna baten baino gehiagotan daude.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude