Donostia arriskuan

Donostia arriskuan –

Aspaldi honetan, Donostian gai sozial ezberdinak lantzen ditugun eragile sozial, sindikal eta politikoak gero eta kezkatuago gaude PNVren eskutik nagusitzen ari den hiri ereduarekin. Kezka horren harira kokatu behar da datorren ekainaren 18an egingo dugun mobilizazio bateratua. Izan ere, Donostian Europako Kultur Hiriburua izan zenetik gaurdaino izugarri indartu da herritarron bizi baldintzak okertzen  dituzten dinamika ekonomiko, kultural, ekologiko, linguistiko zein politikoak, hala nola gentrifikazioa, turistifikazioa, higiezinen espekulazioa, erdalduntzea, askatasun demokratikoen murrizketa…

Donostia arriskuan
Arg: Keta

Mobilizazioa deitzeko unean, aipamen berezia izan du etxebizitzaren larrialdi egoerak, Donostian oinarrizkoa den eskubide sozial bat, etxebizitzarena, gero eta gehiago urratzen delako. Gure hiria historikoki Estatuko hiri garestienetarikoa izanik ere, Eneko Goiak zuzendu dituen azken bi agintaldietan, egoera larriagotu baino ez da egin. Etxebizitzaren prezioa, bai salmentan eta baita alokairuan ere, izugarri igo da, donostiar asko etxetik nahiz Donostiatik botatzeraino.

Hori guztia nahikoa ez eta azken urte hauetan, funts putreei eta multinazional turistikoei ez zaie oztoporik jarri etxebizitzarekin espekulatzeko. Egoera horren inpaktua inguruko herrietara ere zabaltzen ari da, hala nola Astigarragara, Hernanira, Usurbilera… Gazteek, langile prekarioek, migranteek ez dute etxebizitza izateko aukerarik Donostian. Eliteek aldiz, bai, horretarako ondare historikoa txikitu behar badute ere, Bellas Artes eraikinean bezala. Nonahi bizitzeko guztiok omen dugun oinarrizko eskubidea, soilik aberatsena da Donostian.

Oinarrizko eskubideen galera horretan zerikusi handia du PNVek zuzentzen duen turismo eredu masiboak. Donostiaren etorkizuna arriskuan jartzen ari den bidea frenatzeko bitartekoa izan beharrean, Udala espekulatzaileen aldeko tresna bihurtu da Eneko Goiaren eskutik.  Poliki-poliki, Donostian bizi garen gehienon bizi baldintzak okertzen ari dira eta auzoetako jatorrizko sare sozial guztia desegiten. Parte Zaharraren ildotik doaz beste auzoak ere; Gros, Antigua, Igeldo…

Garai bateko Donostiako merkataritza osoa pikutara doa. Komertzio txikia deuseztatu eta nazioarteko marka komertzial nagusiak jabetzen ari dira Donostiaz. Inditex taldeak Donostiako erdialdean duen presentzia ikustea besterik ez dago. Donostiak Europako edozein hiribururen gero eta antz handiagoa du, zer esanik ez metroa izaten dugunean. Sasoi bateko “Perla del Cantábrico” haren parekoagoa da Donostia, elitista, erdalduna, arrazista, kutsatzailea…

Zorionez, errealitate gordin horren aurrean, gero eta indartsuagoa da donostiarron kezka eta baita horri guztiari eman behar diogun protesta sozialaren aldeko nahia ere. Baina Donostiaren eredu kapitalista hori babesten dutenak ez daude gure hirian salaketa soziala eta pentsamendu kritikoa  indartzeko ikusteko prest. Mila frente zabaldu dizkigute, borreroaren mila aurpegiak plazaratuz.

Hor kokatu behar da Donostiako Udaletxea Udal-itxia bihurtzeko Eneko Goiak hartu dituen neurriak, parte hartzeko bideak itxiz, mozioak aurkezteko aukera mugatuz, Plenoak kontrolatzeko bitartekoak ugarituz… Eta, bestetik Donostiako kaleko protesta soziala eta propaganda politikoa debekatzeko landuriko bideak, hala nola Zibismoaren Udal Ordenantza eta Mozal Legea. Azken urteotan, ehunka herritar eta jendarte eragile gehienak zigortu dituzte, beraien eskubide sozial, zibil eta politikoak gero eta gehiago murriztuz, besteak beste, Errauskailuaren Aurkako Mugimendua, Mugimendu Feminista, Euskal Preso Politikoen Aldeko Mugimendua, AZGA, Ernai, GKS, Itaia, IA, Jardun, ELA, LAB, PIZTU Donostia, Mugimendu Antifaxista…

Gauzak horrela, PIZTU Donostia plataformatik argi eta garbi azaldu nahi dugu, PNVren eskutik bideratzen ari den Donostiaren hiri eredua eta Donostiako Udalean Eneko Goiak bideratzen duen Gobernantza txanpon beraren bi aldeak direla, arazo bakarraren bi osagarriak.

Zerrendatutako Donostiako arazo guztien jatorrian aliantza boteretsu bat dago. Bertako eta kanpoko inbertsiogileek, espekulatzaileek eta haien esanetara jarduten duten arduradun politiko zein hedabide handiek osaturikoa benetako amarauna da. Horiek guztiek etekin ekonomiko erraldoia ateratzen diote Donostiari norabide hori emanez eta horrela Gobernatuz, donostiar gehienon bizitzaren duintasunaren kaltetan. Boteredun gutxi batzuen arteko sare boteretsua da hiriko proiektu estrategikoa, agenda publikoa eta Gobernantza kontrolatzen duena, donostiar gehienon kaltetan.

Argi dago Covid19 pandemia ondoren, eliteek “normaltasun berria” zaharra baino errentagarriagoa bihurtzeko neurriak eta planak prestatuak zituztela aspaldidanik. Orduan aipatzen genuen herritarron  Donostia eraikitzeko aukera da arriskuan dagoena. Donostia herritar, solidario, euskaldun, feminista eta demokratikoaren etorkizuna da hipotekatzen ari direna. Horregatik, gure eskubide sozial, zibil eta politikoen defentsan PIZTU Donostia plataformatik ekainaren 18ko mobilizaziora joateko deia zabaltzen diegu donostiar guztiei.

Borrokatuko ez dugun Donostia da galduko dugun bakarra. Mozal Hiriari EZ! Eta Udal-itxiari EZ!

PIZTU Donostia plataformaren izenean

Andoni Rodriguez, Urko Seisdedos, Loren Roca eta Joseba Alvarez

Donostia arriskuan Donostia arriskuan Donostia arriskuan Donostia arriskuan

Zer duzu buruan “Donostia arriskuan”-ri buruz

  • Donostia zuen ingurukoen eskutan utziko bagenu, oso multikultural, inklusibo eta solidarioa den borroka ring erraldoia sortuko zenukete. Sentitzen dut, baina zuen eskaintza ez da bat ere sinesgarria.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude