Borroken kontrabandoan

Borroken kontrabandoan –

Frantziar Errepublikaren eguna den festa egun inposatuan, uztailaren 14ean, Euskal Herriaren eraikuntza mugarritzat hartu eta Larun mendira igotzeko deia egin genion euskal gazteriari Aitzina eta Ernaik.

Borroken kontrabandoan
Arg: Basotxerri (Wikipedia)

Krisi anizkoitza bizi dugun garaiotan, beste behin ere agerian gelditu da 1958an eta 1978an plantan ezarritako konstituzio zapaltzaile banak agintzen duela gure bizitzen eta gure herriaren gainean. Nola errepublikan hala monarkia parlamentarioan, gerla adierazpenekin idatzi dute batasun nazionalaren kontakizuna. Euskal Herria bi estaturen artean banatua dagoela errepikatu digute hamaikagarren aldiz; burdinezko hesiz, kolore guztietako uniformez eta armez hetsi zituzten mugako bideak, Hendaiatik Otsagabiara… Horra hor zertan inbertitzen den zaintza eta osasun baliabideetara bideratzen ez den diruaren zati bat. Gure herrian libreki egin nahi ditugu joan-etorriak, eta tenorea da beste batzuk haien herrira itzul daitezen.

Erabakiak guk hartzen ez baditugu, sistema betikotu nahi dutenek hartzen dituzte gure ordez. Bizitza eredu berri bat aldarrikatzen dugu gazteok, ez Paris eta Madriletik agindutako “normaltasuna”. Zentralismoan, zerbitzu publikoen mendratzean eta autoritarismoan oinarritzen da haien berreraikuntza. Krisia gazteok eta oro har herri sektoreek ordaintzea da eskaintzen diguten irtenbidea. Haatik, Euskal Herria eraldaketa eta erresilientziarako koadrotzat hartzen dugun gazteonak dira krisitik ateratzeko proposamenik errealistenak. Eskubide guziak nahi ditugu pertsona guzientzat, osasungintza, hezkuntza eta lan-mundu duina, zapalkuntza patriarkal irauli eta amalurra zein euskararen biziberritzean sustraitzen den jendartea. Ezkerretik eta abertzaletasunetik haize berriak heldu dira, Ipar Euskal Herrian iragan berri diren herri hauteskundeek eta atzoko EAEkoetako emaitzek erakusten diguten gisan. Burujabetzaz eraikiko baitugu berdinen arteko herria, Bokaletik Tuterara eta Eskiulatik Trebiñura.

Uztailaren 14a: bandera, nortasun agiri, mapa eta muga arrotzak… Hego Lapurdiko, Xaretako, Bortzirietako, Oarsoaldeko, Baztango eta Euskal Herriko beste hamaika txokotako gazteak kontrabandisten eta mugalarien lurretan ibiliko gara bihar. Euskal Herritarrontzat askatasunaren nahiz inposaketaren eremu izan diren Lapurdi eta Nafarroako maldetan. Bera eta Olhetatik abiaturik, mugen gainetik salto egitea da gure anbizioa. Atzo Larungo martxan, eta gaur gure herri eta eskualdeetan, borroken kontrabandoan ibiltzera goaz!

Borroken kontrabandoan
Aitor Servier

Hitza arrazoi eta estakuru.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude