Aralarrek urteak daramatza Ezker Abertzale “zibil eta zabala” osatu behar dela esanez. Ezker Abertzale zabala eurak direla esaten dute, Ezker Abertzale Politikoa. Hainbestetan kritikatu dute Aralarrekoek Ezker Abertzaleak (“ofizialak”) jardunbide politikoa ez duela hartzen.

Bada, gaurko GARAk Aralarreko hiru ordezkari gorenen artikulua irakurri ahal izan dut. Luzea, oparoa eta ziurrenik oso neurtua. Bertan Zabaleta, Abril eta Uberak ETAk eta Ezker Abertzaleak proposatu izan dituzten konponbideek ez dutela balio diote eta beste zerbait egin behar dela. 

Baina bitxiena azkeneko paragrafoa da. Orain jarriko dut, beraz ez baduzu artikulua irakurri lehenago egin klik goiko loturan:

“La paz vasca es la valentía de ponerse en pie, pero no para estarse quietos, sino para acabar el camino emprendido en Alsasua. En la Mesa de Alsasua en 1977.”

Hau da:

“Euskal bakea zutik jartzeko ausardia da, baina ez geldirik egoteko, baizik eta Altsasun hasitako bideari amaiera emateko. 1977ko Altsasuko Mahaian”.

Eta artikulu batean azkeneko paragrafoan beti ideia nagusia jartzen denez, argi dago borobiltzeko erabilitako esaldi honi garrantzia eman nahi diotela. Aralarrek, beraz, Altsasuko Mahaira itzultzea eskatzen du, hau da, estrategia politiko-militarra besarkatzea. Euskarazko Wikipediaren arabera hau da Altsasuko Mahaiaren osaketaren historia:

“1978an Herri Batasuna hauteskunde koalizio gisa sortu zen, hauteskunde deialdiei aurre egin ahal izateko. HB sortzeko prozesua baina lehenago hasi zen, bost alderdi politikok Altsasun sinatutako minimozko dokumentuaren lanketaren harira. Altsasuko Mahaia izena hartu zuen, bere hastapenetan. Hurrengo hilabeteetan bilerak egiten jarraitu zuten, eta hala, Herri Batasuna sortzeko hitzarmena 1978ko apirilaren 27an sinatu zuten. Aurreko bost alderdietatik, bat atzean gelditu zen eta, ondorioz, honako lau alderdiek sinatu zuten: Eusko Abertzale Ekintza (EAE), Euskal Sozialista Batzordea (ESB), Euskal Herriko Alderdi Sozialista (HASI) eta Langileen Alderdi Iraultzaile Abertzalea (LAIA). Haiez gain, beste pertsona ospetsu batzuek ere hartu zuten parte eraketa berrian. Euskadiko Ezkerrak garatutako proiektua baztertu zuten, haien iritzia erreformista zelako, eta haustura demokratikorako agertokia proposatzen hasi ziren. Horretarako, KAS Alternatiba landu zuten, Euskal Herriaren independentzia eta sozialismoa iparrorratz.”

Beraz Altsasuko Mahaia KAS Alternatibaren defentsaren baitan sortu zen. KAS alternatibak honakoa zioen:

• Askatasun demokratikoak
• Preso Politikoen askatasuna
• Estatuko polizi indar zapaltzaileen disoluzioa
• Alderdi politiko guztiak legeztatzea, independentistak barne, euren estatutuak aldatu gabe
• Langileriaren bizi-egoera hobetzea
• Euskadiren subiranotasun nazionala onartzea
• Hego Euskal Herrirako autonomia zabaleko erregimena eratzea

KAS Alternativa KASek eginiko testua zen, garai hartan: EHAS, LAIA, LAB, LAK eta ETA (m). 

Aralarrek proposatzen duena Altsasuko Mahaiaren printzipioetara itzultzea baldin bada, hau da, 0tik hastea abertzale eta ezkertiarren arteko lankidetza momentu hartara itzuli beharko du. Eta KAS Alternatibaren baitan egin beharko litzateke batasuna… edo kanpoan geratuko dira sinatu gabe, Euskadiko Ezkerra geratu zen bezala?