CAF enpresak eta Elhuyar Fundazioak irailean abiarazi zuten aurtengo CAF-Elhuyar sarien prozesua, helburu hauekin: zientziaren eta teknologiaren arloko gaien eta ikerketen euskarazko dibulgazioa eta kazetaritza bultzatzea, saritzea eta aintzatestea. Ohiko atalez gain (dibulgazio-artikulu originalak eta zientzia-kazetaritzako lanak), aurtengoan kategoria berri bat izango dute Sariek: “Zientzia gizartean” sorkuntza-beka. 2013ko urtarrilaren 31ra arte aurkez daitezke lanak.

Beka berriari dagokionez, zientziaren/teknologiaren eta gizartearen arteko elkarrekintza sustatzen duten proiektuei laguntzea du xede sariketak. Zientifikoak, artistikoak zein soziologikoak izan daitezke proiektuak, eta arlo zientifikoa eta soziala uztartzen saiatu behar dute. Edozein arlo artistiko, soziologiko edo zientifikotako proposamenak onartuko dira sariketan: ikus-entzunezkoak, dantza edo musika ardatz dutenak, esperimentu artistiko sozialak, argazkilaritzakoak, gizartea helburu duten ikerketa zientifikoak, azterketa soziologikoak… Kategoria honetako irabazleak, 5.000 €ko beka jasoko du.

Dibulgazio-artikulu originalen kategorian, 2.000 €ko bi sari emango dira: bata, dibulgazio-artikulu orokor onenari; bestea, egilearen doktore-tesian oinarritutako dibulgazio-artikulu onenari. Zientzia-kazetaritzaren arloko lanen kategorian, 2.000 euroko sari bat emango da. 2012an argitaratu diren zientzia-kazetaritzako lanak aurkeztu daitezke, edozein formatu eta generotakoak.

cafelhuyarsariak.elhuyar.org webgunean dituzue CAF-Elhuyar Sarien oinarriak eta sariketari buruzko informazio guztia.

Epaimahaia —Zientziaren, euskararen eta kazetaritzaren alorrean eskarmentu handiko jendez osatua— otsailean elkartuko da, saridun nor diren erabakitzera. 2013ko apirilean jakinaraziko da, ekitaldi publiko batean, zein diren arlo bakoitzeko irabazleak.