Irailaren lehena

Irailaren lehena –

Egun berezia da gaur, lanean hasteko eguna. Uda bukatu zaizu eta udazkena arte gelditzen diren hogeiak, abuztuan lortu duzun beltzaran-kolorea nola higatzen den ikusten joango zaizkizu.

Bart amesgaiztoak izan dituzu: nagusiaren aurpegi ozpinduaren erdian “gaur ere berandu” jaurtikitzen duten ezpain ikaragarri batzuk; lankideen mahaietatik zurera hegan doaz paper pila erraldoiak; kexa-liburuak astinduz datozen bezero haserretuen ilara amaigabea; belarriak zulatzen dizkizun tailerreko makinen zarata burrunbatsua; zu itotzeraino hazten doaz bulegoko paretak gero eta lodiago, gero eta altuago, gero eta ilunago; denak batera marruka mehatxatzen datorkizun ikasle masa ikaragarria; “bihar ere lanera, etzi ere bai lanera, etzidamu lanera” etengabeko letania errepikatuz inguratzen zaituen herio itxurako mamu-hegalari saldoa…

Esnatu zarenean, oso urrun sentitu dituzu opor hasierako egun distiratsuak, ia ahaztuta dituzu ur izkinan egindako ibilaldiak, kamiseta kenduta igotako mendi maldak, eguzkipean asmatutako fantasia beroak.

Autoan mp3-a piztu duzu, baina are gogorragoa egiten zaizu lantokirako bidea udako arratsaldeetako usaina dakarkizun doinuekin. Irratia piztu duzu, gaur irailaren lehena dela eta zenbatentzat den lan-hasierako eguna eta horrek ekartzen duen nahigabeaz eta estresaz solasean ari den esatariari entzuteko.

Lantokira iristean, barrena nahastuta, eztarrian sekulako korapiloa eta malkoak begietako hegian eutsi ezinik -zu eta lanaren artean segurtasun distantzia premiazkoa jartzearren- ordenagailua piztu eta eguneko albisteak aukeratu dituzu, badakizulako krisi ekonomikoaren larriaz enegarren aldiz irakurtzeak anestesia-efektu eraginkorra izango duela. Oporretan bezala, Zuzeu jarri duzu nabigatzailean eta Irailaren lehena honetan, ispiluan antzera, zure burua ikusi duzu islatuta. Negarrez lehertu zara.

Irailaren lehena
lana, oporrak
Arantza San Sebastian

ITSASGORAN - Irakaslea ofizioz, Idazlea afizioz

Utzi erantzuna

Zure e-posta helbidea ez da argitaratuko. Beharrezko eremuak * markatuta daude