Gürtel kasua dela eta, Francisco Campsek bi aukera ditu mahai gainean: erruduntzat jo bere burua eta isuna ordaindu epaiketa saihesteko, edo kasuarekin aurrera jarraitu eta bere errugabetasuna defendatzen segitu, epaiketa galtzeko eta kartzelan amaitzeko duen arriskuarekin. Valentziako Erkidegoko presidenteak ez dio lehenengo aukerari muzinik egin; horrek esan nahi du bere errugabetasuna defendatzen eman dituen azken bi urteetan herria engainatzen egon dela. Eta hori gutxi ez balitz bezala, Campsek ez lioke karguari uko egingo. Aurrekari penalak dituen presidente bat boterean? Nola liteke?

Sobornatze-kondena onartu ostean, Valentziako PPko presidenteak politikan jarraituko luke erkidegoaren gidaritzan, inolako lotsarik gabe. Politikarien izen-abizenak daramatzaten hainbat eskandalu kasuen lerroburuak irakurri izan ditugu azken aldian eta horietako gehienetan, kakaz zipriztindutako politikari edo kargu publikoek dimisioa aurkeztu izan dute:

• 2008: New Yorkeko gobernadoreak  dimititu egiten du sexu-eskandalu baten ostean: “Nire bizitza politikoan beti exijitu izan dut jendeak bere jarreraren ardura hartzea. Ezin diot neure buruari gutxiago eskatu, horregatik dimisioa aurkezten dut”.
• 2011: Anthony Weiner AEBetako kongresistak dimititu egin du zenbait emakumeri argazki eta mezu lizunak bidali ostean sortutako eskandaluarengatik. “I am here today to again apologize for the personal mistakes I have made and the embarrassment I have caused”.
• 2011: Londreseko Metropoliko Poliziako buruak dimititu egin du entzute ilegalen eskandaluarengatik.
• 2011: Txipreko Kanpo Arazoetako ministroak dimititu egin du itsasontzi-base batean izandako eztandaren ostean.

Hanka-sartzeak onartzea, barkamena eskatzea eta erantzukizun publikoak bertan behera uztea dira profesionaltasunez eta duintasunez jokatzen duten kargu publikoen zeregina. Egingo al du Campsek horrelakorik?