Norteko Ferrokarrilla: dagoeneko 17 urte zurekin

  • Bihar gaueko bederatzietan hasiko da Elhuyar Fundazioak ekoizten duen Norteko Ferrokarrilla irratsaioaren denboraldi berria Euskadi Irratian.
  • Berrikuntza nagusia “Zientziaren hitzak” izeneko atala izango da.
  • Lehen saioan galdera bati erantzuna ematen saiatuko dira, alegia, Adamen zein hezur erabili ote zuen Jainkoak Eva egiteko.

Elhuyar Fundazioak Euskadi Irratiarentzat ekoizten duen Norteko Ferrokarrilla irratsaioak bihar ekingo dio denboraldi berriari. EITBk 30 urte beteko ditu aurten, eta erdietan baino gehiagotan izan da Norteko Ferrokarrilla antenan. Guillermo Roa kimikariak gidatzen du irratsaioa, Elhuyar Fundazioko Zientziaren Komunikazioa sailaren laguntzarekin, eta asteartero emitituko dute, 21:00etan (igandeetan, 22:00etan, errepikapena emango dute), ordubetez.

Lehen saioan galdera bati erantzuna ematen saiatuko dira, alegia, Adamen zein hezur erabili ote zuen Jainkoak Eva egiteko.Galdera horretatik abiatuta, EHUko Jesus Mari Txurruka biologoak saiakera interesgarri bat idatzi du, eta Elhuyar aldizkarian argitaratu du. Erantzuna ez da saihetsa, baizik eta gutxik esperoko lukeen hezur bat, ugaztunetan ohiko izan arren gizakiek ez dutena.

Bestalde, denboraldi berriaren nobedadeen artean, azpimarratu beharra dago “Zientziaren hitzak” izeneko atala, zientzia munduan erabiltzen diren hitzen historia eta nondik norakoak azalduko dituen atala. Irratsaioak Euskal Herriko Unibertsitateko kolaboratzaileak izango ditu aurten ere: geologoak eta Nahikari Blanco matematikaria, esaterako. Bestalde, Rafa Saiz biologoak “Mokoka” atalarekin jarraituko du aurten ere. Iraupenari dagokienez, 42 programa izango dira guztira. Azkenik, Facebook-en ere egin ahal izango da Norteko Ferrokarrillaren jarraipena, uhinetatik sare sozialetara emandako saltoa baliatuz.

Astero emititzen diren programak http://norteko.elhuyar.org webgunean egongo dira eskuragarri, mp3 formatuan, nahi duenarentzat. Asteroko emisioez gainera, azken urteetan ekoitzitako erreportajeak ere aurkituko ditu erabiltzaileak webgune horretan.

Elhuyar 1972an jaio zen zientzia eta euskara uztartzeko asmoz. Elhuyarrek Kultur Elkarte bezala egin zituen lehen urratsak eta 2002an Fundazio bihurtu zen. Ordutik, Elhuyar Fundazioak etengabe dihardu lanean zientzia eta teknologia gizarteratzeko eta euskararen garapena bultzatzeko. Elhuyar Fundazioa irabazi asmorik gabeko erakundea da eta hainbat diru-iturriri esker dirau lanean: bazkideen ekarpenak, diru-laguntza publikoak eta Elhuyarrek ekoizten dituen produktuetatik lortutako mozkina. Elhuyarren xedea hauxe da: Euskara zientzian, teknologian eta gizartean sendotzen eta harentzako arlo berriak eraikitzen egiten dugu lan, euskal komunitate aktiboa eta kritikoa helburu.