Gaur goizean udaletxean emandako prentsaurrekoan azpimarratu dutenez, informazio publikorako epea amaitu orduko egin diete lurjabeei desjabetza-aktak sinatzeko deia; “interesatuek eginiko alegazioak erantzun barik”, Onintze Oleaga zinegotziak esan duenez. Atxondoko Udalak Abiadura Handiko Trenaren proiektuaren kontra egindako argudioak jasotzen dituztenak eta atxondarrek aurkeztutako 159 alegazio teknikoak daude erantzuteke. Alegazio horiek landu eta erantzun ezik, “legeak ezartzen dituen arauak bete barik” dabiltzala proiektuarekin aurrera egiten salatu dute bildutakoek.